Ermənistanda anti-Rusiya əhval-ruhiyyəsi pik həddə
çatıb.
Publika.az xəbər verir ki, bu barədə erməni politoloq,
şərqşünas Karine Qevorqyan deyib.
Onun fikrincə, Rusiyanın Ermənistanda aktivliyi azdır, əvəzində
Qərb onun yerini doldurur: “Ermənistanda bir çox fondlar və
siyasətçilər ABŞ tərəfdarı kimi çıxış edir. Bu halda Amerikadakı
erməni icmasının da rolu böyükdür. Bu gün Ermənistan Maydan
dövrünün Ukraynasını xatırladır”.
Yaranmış bu vəziyyət Rusiyanı narahat edir, xüsusilə erməni hərbi
birləşmələrinin NATO-nun Gürcüstanda keçirdiyi sonuncu təlimlərə
qatılması vəziyyətin ağırlığından xəbər verir. Bir sıra ekspertlər
Qərbin Ermənistanda aktivliyini kəsmək üçün Rusiyanın müxtəlif
formalarda, hətta hərbi yolla bu ölkəyə müdaxilə edə biləcəyini
düşünür.
Rusiyalı politoloq Nikita İsayevin fikrincə, Ermənistanda əsas
rusiyayönümlü siyasətçi prezident Serj Sarkisyandır:
“Onun aşağı reytinqinin olması da məzh rusiyayönümlü olması ilə
əlaqədardır. Ötən ilin yayında Ermənistanda anti-Rusiya
əhval-ruhiyyəsi 82 faiz idi. Parlament seçkilərindən sonra isə
erməni ictimaiyyəti hakimiyyətdən Qərbə istiqamətlənən siyasət
aparmağı tələb edir. Bu gün Ermənistanda hakimiyyətin bütün
institutları hərfən də olsa, parlamentə keçib, bu da Rusiyaya
münasibətə təsir edir. Avropa İttifaqına inteqrasiya, NATO ilə
hərbi əlaqələr və s. Ermənistan hakimiyyətindən bu tələb
olunur”.
N.İsayev hesab edir ki, erməni KİV-i də problemi ağırlaşdırır:
“Faktiki olaraq, bu ölkədə rusiyayönümlü olan yeganə media orqanı
“Sputnik Armenia”dır. Bir qədər də “News Armenia” seçilir. Yerdə
qalanların əksəriyyəti qərbyönümlü mövqe tutur, çox az hissəsi isə
neytraldır. Burada Qərb xüsusi xidmət orqanlarının, ilk növbədə
ingilis, fransız və amerikalı kəşfiyyatçıların rolu da böyükdür.
Qərb kəşfiyyatı Ermənistanda Rusiyadan daha fəal işləyir və nəticə
əldə edirlər. Mən qorxuram ki, bu proseslərin nəticəsi olaraq biz
təkcə Ermənistanı itirmirik, həm də 2-3 il sonra onun timsalında
yeni düşmən qazana bilərik”.
Rusiyalı politoloq qeyd edib ki, bu vəziyyət Moskvanın Cənubi
Qafqazda sonuncu qalasını itirməsi deməkdir.
“Görünən budur ki, hər şey belə davam edərsə, yaxın dövrdə Rusiya
Ermənistanda NATO ilə rəqabətə girəcək. Biz bunun qarşısını almaq
üçün iqtisadi sferada və KİV sahəsində yeni addımlar atmalıyıq”, -
deyə o bildirib.
Siyasi Tədqiqatlar İnstitutunun direktoru, rusiyalı politoloq
Serqey Markov da hesab edir ki, Ermənistan Ukraynanın yolunu
gedir:
“Ermənistan hakimiyyəti də anti-Rusiya kampaniyasına lazımi
reaksiya vermir. Ermənistan artıq Ukraynanın yolu ilə gedir. Bu,
Rusiya üçün ciddi risklər vəd edir. Hər hansı Maydan tipli
hadisələr erməni hakimiyyətinə Qərbə üz tutmağa əsas yarada bilər
və Ermənistan Avrasiya İqtisadi İttifaqından çıxa bilər. Ermənistan
Rusiyaya qarşı potensial düşmən ola bilər. Necə ki, Ukrayna,
Baltikyanı ölkələr, yaxud Modova oldu, ermənilər də buna gedə
bilərlər. Hər şey hökumətlərdən asılıdır. Bu baxımdan, İrəvan
hakimiyyəti anti-Rusiya əhval-ruhiyyəsinə qarşı nəsə
etməlidir”.
Hər iki rus politoloqun Kremlə yaxınlığı onların səsləndirdiyi
fikirləri əslində, Rusiyanın Ermənistana xəbərdarlığı kimi də qəbul
etmək olar. Bunun reallığını qəbul etsək, hesab etmək olar ki,
Rusiya yaxın dövrdə Ermənistana ciddi müdaxilə edə bilər, yaxud
anti-Rusiya kampaniyasının qarşısını alması üçün Sarkisyana
qulaqburması verə bilər.
Asif