Bakı. 23 avqust. REPORT.AZ/ Rusiyanın Nijni Novqorod şəhərində “QAZ” avtomobil zavodunun ərazisində bir kişi bıçaqla insanlara hücum edərək 3 nəfəri öldürüb, 2 nəfəri ağır yaralayıb.
“Report” Rusiya KİV-inə istinadən xəbər verir ki, həmin şəxs zavodun keçmiş işçisi olub.
İnformasiyaya əsasən, hücum səbəb zavod rəhbərliyinin onu işdən çıxmağa məcbur etdiyi ehtimal olunur. Məlumata görə, həmin şəxs zavod rəhbərliyinə hücum etməklə işdən çıxarılmasının qisasını alıb.
“O, işə gəlmişdi. Ona dedilər ki, işdən çıxarılıb. O, da özünü saxlaya bilməyib bu hadisəni törətdi”, - deyə zavodun əməkdaşlarından biri bildirib.
Hadisə yerinə təcili tibbi yardım maşınları və həkimlər cəlb olunub.
Hələlik hüquq –mühafizə orqanları rəsmi açıqlama verməyib. Hadisəni törətməkdə şübhəli bilinən şəxsin axtarışı davam edir.
