"Azexport"a 7 ayda 53 ölkədən 264 mln. ABŞ dolları məbləğində ixrac sifarişi daxil olub

"Azexport"a 7 ayda 53 ölkədən 264 mln. ABŞ dolları məbləğində ixrac sifarişi daxil olub
20:12 23 Avqust 2017
Ölkə mətbuatı
A- A+

Bakı. 23 avqust. REPORT.AZ/ İqtisadi İslahatların Təhlili və Kommunikasiya Mərkəzinin (İİTKM) İxrac İcmalı”nın avqust ayı üçün sayı təqdim olunub. 
İİTKM -dən "Report"a daxil olan məlumatda bildirilib ki, icmalın bu sayında 2017-ci ilin 7 ayı ərzində qeyri-neft sektoru üzrə 855 mln. ABŞ dolları dəyərində mal ixrac olunduğu göstərilib. İxrac əməliyyatlarında 1 333 subyekt iştirak edib. Bu ilin 7 ayı ərzində qeyr-neft məhsullarının ixrac edildiyi ölkələrin siyahısında ilk beşlikdə Rusiya, Türkiyə, Gürcüstan, İsveçrə və Türkmənistanın adı var.
7 aylıq məlumatlarının təhlilindən aydın olub ki, qeyri-neft sektoru üzrə ixracda birinci yeri pomidor (tomat) (127,9 mln. ABŞ dolları), ikinci yeri qızıl (60,7 mln. ABŞ dolları), üçüncü yeri isə xüsusi kütləsi 0,94-dən az olan ilkin formalı polietilen (54,4 mln. ABŞ dolları) tutur.
2016-cı ilin müvafiq dövrü ilə müqayisədə 2017-ci ilin 7 ayı ərzində pambıq lifi ixracı 8,3 dəfə, elektrik enerjisi 3,2 dəfə, çay 60%, meyvə-tərəvəz 42%, kimya sənayesi məhsulları 30%, alüminium və ondan hazırlanan məmulatlar 29%, spirtli və spirtsiz içkilər 26%, plastmas və onlardan hazırlanan məmulatlar 12% artıb.
2017-ci ilin iyul ayında isə qeyri-neft sektoru üzrə 459 subyekt tərəfindən 117 mln. ABŞ dolları dəyərində ixrac əməliyyatları həyata keçirilib. “Azexport.az” portalının qeyri-neft sektoru üzrə ixraca töhfə verməsinə gəlincə isə “İxrac İcmalı”nda qeyd edilir ki, 2017-ci ilin 7 ayı ərzində "Azexport. az" portalına dünyanın 53 ölkəsindən 264,3 mln. ABŞ dolları məbləğində ixrac sifarişləri daxil olub. "Azexport.az" portalına iyul ayında daxil olan ixrac sifarişlərinin dəyəri iyun ayı ilə müqayisədə 15 % çox olub. Belə ki, "Azexport.az" portalına 2017-ci ilin yanvar ayında 48, fevral ayında 6,5, mart ayında 27, aprel ayında 29,9, may ayında 19, iyun ayında 62,3 və iyul ayında 71,6 mln. ABŞ dolları dəyərində ixrac sifarişləri daxil olub.
"Azexport.az" portalına daxil olan ixrac sifarişlərinin ilk beşliyində isə Rusiya (19%) ilə yanaşı Ukraynanın (7,8%), Türkiyənin (7,4%), ABŞ-ın (4,8%) və Səudiyyə Ərəbistanının (4,8%) adı var.
2017-ci ilin iyul ayında "Azexport.az" portalına ilk dəfə Qətər, Tanzaniya və Ekvador kimi ölkələrdən sifarişlər daxil olub. İyul ayında daxil olan sifarişləri məhsullar üzrə təhlil etdikdə aydın olur ki, qida sənayesi məhsulları başda olmaqla qeyri-neft sektorunda istehsal olunan müxtəlif məhsullara - fındıq ləpəsi, şərab, kosmetik vasitə, tütün, göbələk, uşaq alt paltarı, konservləşdirilmiş inək əti, quru süd, mebel, toyuq yumurtası, dondurulmuş toyuq əti, albalı şirəsi, ipək xalça, mahlıc, pambıq linti, alma, kərə yağı, avtomobil diaqnostika qurğusu, mühərrik yağı və s. tələbat böyükdür.
Bu məhsullar içərisində mahlıca, pambıq lintinə, almaya, fındıq ləpəsinə, toyuq ətinə müxtəlif ölkələrdən daxil olan sifarişlərin hər birinin dəyəri ayrı-ayrılıqda 1 mln. ABŞ dollarından çox olub.
Həmçinin “İxrac İcmalı”nın bu sayında pambıqçılığın inkişafı qeyri-neft sektoru üzrə ixracın artmasına töhfəsi, "Azexport.az" portalı vasitəsi ilə Azərbaycan mallarının "Amazon.com" portalında yerləşdirilməsi, gömrük bəyannamələrinin Rəqəmsal Ticarət Qovşağı vasitəsilə doldurulması, "Eskrou" xidmətindən istifadə imkanları, pambıq və tütün məhsullarının istehsalı, emalı və ixracı ilə məşğul olan şirkətlər barədə məlumatların "Azexport.az" portalında yerləşdirilməsi barədə də ətraflı məlumatlar əksini tapıb.
“İxrac İcmalı”nın məqsədi sahibkarları ixracla bağlı maarifləndirməyə, yerli malların ənənəvi və yeni bazarlara çıxarılması imkanlarını artırmağa və beynəlxalq bazarlara inteqrasiya prosesini sürətləndirməyə xidmət edir.
“İxrac İcmalı”ı ilə www.iqtisadiislahat.org saytının İcmallar bölümündə tanış olmaq mümkündür.
http://iqtisadiislahat.org/store//media/documents/ixrac_icmali/avqust/ExportReview_2017-5.pdf












Xəbərin orijinal ünvanı: https://report.az/biznes/azexporta-7-ayda-53-olkeden-264milyon-abs-dollari-ixrac-sifarisi-daxil-olub

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR