Bakı. 24 avqust. REPORT.AZ/ Rusiya xarici işlər naziri Sergey Lavrov Fars körfəzindəki ərəb ölkələrinə səfərlər edəcək.
"Report" xəbər verir ki, bu barədə bu gün brifinqdə Rusiya Xarici İşlər Nazirliyinin mətbuat katibi Mariya Zaxarova bildirib.
Onun sözlərinə görə, S.Lavrov Küveyt, BƏƏ və Qətərə səfər edəcək. Səfərlər zamanı o, bu ölkələrin dövlət başçıları və xarici işlər nazirləri tərəfindən qəbul ediləcək.
"Səfərlər zamanı ikitərəfli əməkdaşlığın perspektivləri, eləcə də Qətər ətrafındakı vəziyyət müzakirə ediləcək. Rusiya tərəfləri qarşıdurma yaradan ritorikadan yayınmağa və danışıqlar masası ətrafında müzakirələr yolu ilə kompromis əldə etməyə çağırır", - o deyib.