Azərbaycan, Bakı, 9 yanvar /Trend, müxbir Məftun Salmanov/
BMT-nin Mərkəzi Afrika Respublikası üçün yaratdığı İstintaq Komissiyası bu ölkədə müsəlmanlara qarşı etnik təmizləmənin aparıldığı qənaətinə gəlib.
Trend-in Türkiyənin "Cihan" agentliyinə istinadən verdiyi məlumata görə, bununla belə, komissiya soyqırım dəlili tapılmadığına dair qərar verib.
BMT-nin Təhlükəsizlik Şurasına təqdim edilən yekun məruzədə bildirilir ki, ölkədəki çevrilişdən sonra baş vermiş hücumlar nəticəsində 6 min insan öldürülüb.
Qeyd edək ki, 2013-cü ilin martında Afrika ölkəsində Seleka qrupunun lideri Mişel Cotodia dövlət başçısı Fransua Bozizeni devirdikdən sonra xristian "Anti-Balaka" silahlı qruplaşması ölkədə bütün müsəlmanlara hücuma başlamışdı.
Məqalə müəllifi ilə əlaqə ünvanı: agency@trend.az
