7 sen 2023 11:18
Şeirlər ruhumuzun zəfər zəngi
Səsə gizlənib bircə ümid çırpıntısı
Bəzən gözləmədiklərinin ahıdır
Təkliyinin qarğışı,
Qəlbin kövrək notlarını unudanda
Şeirlər ruhumuzun zəfər zəngidir.
Payız küləyinin əsintisindən baxır hisslərimiz,
“Necə edim ki ölməyim” sualının cavabıdır
Şeirlərdəki misralar,
İnsan ləyaqəti ağlaya bilməyəndə
Saxta təbəssüm həyatın maskasıdır.
Unudulub itənlərdədir qəzəbimizin açarı
İnsanlar qəbiristanlıqlarda ölmürlər
Yaşamaqdan həzz almayanda,
“Artıq səni istəmirəm” duyanda
Ölmək nəfəs almaqdan da yaxşıdır.
Vaxtınd qədrini bilmədiklərimiz keçmişimizdir
Gələcəyimizin də bir parçasıdır
Heç vaxt beyindən silinməyənlər,
Bir gün peşmanlıqdır,
Əvvəldə buraxdıqlarımızın içimizdəki kölgələri.
Mən üsyankar misraların sonsuz vergülü
Danışa bilməyəndə sığndığımızdır
Poeziyanın misilsiz ruhu,
Amma həm də gedə bilməməkdir,
İtə bilməməkdir,
Yox olmamaqdır,
“Bəlkə bir gün...” ümidi.
RƏNGLƏR
Mən səni rənglərin harmoniyası kimi sevirdim
Nə az, nə çox,
Bir az qədərində,
Bəlkə bir az da artıq.
Qırmızı rəng kimi parıldayırdı saçların,
Sənin qızılı saçlarında dəniz tufanları kimi olurdum.
Sarı rəngin melodikliyi idi gülüşlərin,
Sən güləndə dünya dururdu sanki
Bir addım daha atmaq üçün sənə
Saatlarla savaşır,
Saniyələri qovurdu aşiqin.
Yaşıl rəngin oyanışı idi gözlərin
Təbiət canlanırdı baxışlarında
Solan yarpaqlar diçəlir
Sanki payız heç olmurdu sən güləndə.
Bənövşəyi rəng idi ən sevdiyimiz rəng,
Bir az güldürürdü,
Bir az zövq verirdi mübahisələrimiz.
Bir anlıq sükut çökəndə
Sanki rənglərdə solurdu köksümüzdə.
Səni bəmbəyaz sevirdim,
Ağ rəngdə idi sevginin rəngi,
Sevmək elə ağ bayraq qaldırmaq idi,
Sevginə ağ bayraq qaldırıb
Gözəlliyinə təslim idi varlığım.
Savaş fleytası
Yenə hansısa bir uzaq nöqtədə
Planlar cızılır, savaşlar hazırlanır.
Atılan hər güllə
Bir körpənin yetimliyi,
Bir ailənin hüznü,
Bir qadının əbədi təkliyi,
Bəşəriyyətin sonsuz korluğu olur.
Dünyanı xilas edə bilməyənlərin
Bəşəri bəlasıdır savaş fleytası.
Tarixi qəhərə boğan
Qorxu keçmişi,
Kədər yaddaşı,
Unuda bilməmək rəmzidir savaş fleytası.
Həm də...
Həm də...
Şahlanış,
Qürur,
Milli birlik musiqisinin memarıdır svaş fleytası.