10 İyun 2024 13:05
Hələ may ayının əvvəllərindən başlayaraq, COP29 kimi bir tədbirin yüksək səviyyədə keçirilməsini təmin etmək üçün Dövlət Turizm Agentliyi işlərə başlayıb.
Dövlət Turizm Agentliyinin sədr müavini Azadə Hüseynova mediaya açıqlamasında bildirib ki, Bakı, Sumqayıt şəhərləri və Abşeron rayonunda fəaliyyət göstərən 300-dən artıq yerləşmə vasitəsi audit olunub və onlardan 200-ə yaxını təsnifatdan keçirilərək ulduz dərəcəsi əldə edib. Ulduz təsnifatından keçməyən 40-a yaxın hotelə nöqsanları aradan qaldırılmaq üçün müddət verilib. Sədr müavininin sözlərinə görə, hazırda regionlarımızda yerləşən hotellərdə də ulduz təsnifatı üzrə işlərə başlanılması nəzərdə tutulur.
Hotellər və Restoranlar Assosiasiyasının sədri, Azərbaycan Ekoturizm Assosiasiyasının İdarə Heyətinin sədri Samir Dübəndi Metbuat.az-a məsələ ilə bağlı açıqlama verib. O bildirib ki, turizm sektorunda cari ilin yaz aylarından başlanan canlanma ilin sonuna qədər bu sürətdə davam edəcək:
"Bu ilin noyabr ayında "Yaşıl dünya naminə həmrəylik ili" çərçivəsində BMT-nin möhtəbər tədbirindən biri COP Bakıda keçiriləcək. Sentyabr ayında isə Formula-1 yarışlarının keçirilməsi planlaşdırılıb. Hazırda diqqət mərkəzində olan Azərbaycanda turizm sənayesində rəqabət mühiti hiss olunur. Hesab edirəm ki, turizm sahəsində bu fürsətdən yararlanaraq daha da maraqlı, cəlbedici və rəqabətli təkliflər irəli sürüləcəkdir.
Artıq COVİD -19 pandemiyasının təsirlərləri geridə qalıb. Turizm və qonaqpərvərlik sənayesi genişlənərək, yeni startaplar yaradılmağa başlanılıb. Xüsusəndə mikro biznes subyektlərinin sayı artmaqdadır”.
COP 29-dan böyük gözləntilər olduğunu vurğulayan Samir Dübəndi bildirib ki, noyabr ayında turizm, nəqliyyat şirkətləri, bələdçilər fəaliyyətlərini daha yüksək keyfiyyətdə göstərmək üçün planlar qururlar.
“Bildiyiniz kimi turizm yerləşdirmə, qidalanma, nəqliyyat və əlavə xidmətlər üzərində qurulan fəaliyyət növüdür. Qeyd edilən seqmentlərdə də müxtəlif hazırlıq işləri aparılır. Hotellər və digər yerləşdirmə vasitələri otaq fondunu, xidmətlərini, personalı təkmilləşdirərək, dövlət qurumları tərəfindən qida sektoru müvafiq qurumlar tərəfindən yoxlanılır. Bu obyektlərdə sanitariya-gigiyena qaydalarına, qida təhlükəsizlik tələblərinə riayət edilmə məsələləri nəzərdən keçirilir. Hotel adı daşıyan yerləşdirmə obyektlərinin təsnifat sisteminə qoşulmaqları haqqında təşviqat davam edir”.
Samir Dübəndi düşünür ki, xidmət sektorunda mövcud çətinliklər olsa da, bunun aradan qaldırılmasında hər kəs öhdəsinə düşəni etməlidir:
“COP29 və digər möhtəbər tədbirlər zamanı ölkə sənayesinin, iqtisadiyyatının üzərinə ciddi məhsuliyyət düşür. Əgər layiqli xidmət göstərilərsə, ölkənin iqtisadi, sosial, ekoloji imicinin formalaşmasına müsbət təsir göstərəcək. Digər tərəfdən bu sahədə olan biznesin inkişafı üçün müvafiq şəraitin yaradılması zəruri hesab edilməlidir”.
Gülbəniz Hüseynli / Metbuat.az