17 Oktyabr 2024 20:18
2020-ci ilin sentyabr ayının 27-də səhər saat 6-dan başlayaraq erməni silahlı qüvvələri və qanunsuz silahlı birləşmələri atəşkəs rejimini və beynəlxalq hüquq normalarını, o cümlədən silahlı münaqişələr zamanı mülki şəxslərin müdafiəsinə dair 12 avqust 1949-cu il tarixli Cenevrə Konvensiyasının tələblərini kobud şəkildə pozaraq Azərbaycan Respublikasının cəbhə boyu Cəbrayıl, Füzuli, Goranboy, Tərtər rayonları, Gəncə, Mingəçevir şəhərləri və digər yaşayış məntəqələrində yerləşən müdafiə olunmayan ərazilərə, yaşayış məntəqələrinə, habelə hərbi hədəf olmayan, aydın görünən və fərqləndirilən təhsil və tibbi müəssisələrinə, həmçinin mülki əhaliyə və ya döyüşlərdə iştirak etməyən ayrı-ayrı mülki şəxslərə iri çaplı silahlardan, mina və qumbara atanlardan, ağır artilleriya qurğularından, habelə raketlərdən intensiv atəşə tutmaqla hərbi zərurət olmadan hücum etmiş, bununla hərbi zərurətdən irəli gəlməyən geniş miqyaslı dağıntılar törədilməsi, hərbi əməliyyat bölgələrində mülki vətəndaşların xəsarət alması və həlak olması ilə nəticələnən, habelə mülki əhalinin əmlaklarının məhv edilməsi ilə müşayiət olunan zorakılıq əməlləri törətmişlər.
O cümlədən erməni silahlı qüvvələri və qanunsuz silahlı birləşmələri 2020-ci il oktyabr ayının 4, 5, 8, 11 və 17-də Gəncə şəhərində yerləşən müdafiə olunmayan ərazilərə, yaşayış məntəqələrinə, habelə hərbi hədəf olmayan, aydın görünən və fərqləndirilən təhsil və tibbi obyektlərinə, həmçinin mülki əhaliyə və ya döyüşlərdə iştirak etməyən ayrı-ayrı mülki şəxslərə “Smerç” və «Elbrus» tipli raketlərlə zərbələr endirməklə hərbi zərurətdən irəli gəlməyən geniş miqyaslı dağıntılar, mülki vətəndaşların xəsarət alması və ölümü ilə nəticələnən, habelə mülki əhalinin xüsusilə külli miqdarda əmlakının məhv edilməsi ilə müşayiət olunan terrorçuluq və digər cinayətlər törətmişlər.
04 oktyabr 2020-ci il tarixdə Gəncə şəhərinə edilmiş terror hücumları faktı üzrə Harutunyan Araik Vladimroviç və digərləri barəsində, Azərbaycan Respublikasının Baş Prokuroru tərəfindən Azərbaycan Respublikası CM-nin 100. 116. 117, 120. 186. 214. 218. 228. 279.-cu maddələri ilə cinayət işi başlanılmışdır.
İstintaq zamanı qeyd olunan hadisələrin hər biri üzrə hadisə yerlərinə baxış keçirilmiş, həlak olmuş şəxslərin meyitlərinin tibb eksperti tərəfindən müayinəsinin aparılması, habelə xəsarət almış şəxslərin almış olduqları xəsarətlərə dair tibbi rəylərin alınaraq iş materiallarına əlavə edilməsi, eyni zamanda xəsarət almış şəxslərin zərərçəkmiş şəxs qismində tanınmalarına dair qərarların qəbul edilərək və sair istintaq hərəkətlərinin həyata keçirilməsi təmin edilmişdir.
Belə ki, 2020-ci il oktyabr ayının 4, 5, 8, 11 və 17-də Gəncə şəhərinə edilmiş raket hücumları nəticəsində Azərbaycan Respublikasının Gəncə şəhəri üzrə 26 nəfər mülki şəxs qəsdən öldürülmüş, 175 nəfər isə müxtəlif dərəcəli bədən xəsarətləri almışdır. Eyni zamanda Gəncə şəhəri üzrə ümumilikdə həlak olmuş 26 nəfərdən 10-u kişi, 10-u qadın, 6-sı isə yetkinlik yaşına çatmayan şəxslərdir. Xəsarət almış 175 nəfərin isə 61-i kişi, 66-sı qadın, 48-i isə yetkinlik yaşına çatmayan şəxslərdir.
Gəncə şəhərinə hücumlar nəticəsində dövlət mülkiyyətində olan 21 sayda daşınmaz əmlaka zərər yetirərək 14.126.682 manat, xüsusi mülkiyyət üzrə 3.396 fiziki şəxsə məxsus 3.469 sayda daşınmaz əmlaka zərər yetirərək 72.407.444 manat, 85 fiziki şəxsə məxsus 92 nəqliyyat vasitəsinə zərər yetirərək 230.168 manat, 83 fiziki şəxsə məxsus sahibkarlıq obyektlərinə zərər yetirərək 597.350 manat, 1 fiziki şəxsə məxsus kənd təsərrüfatı obyektinə zərər yetirərək 2400 manat olmaqla, ümumilikdə 3.565 fiziki şəxsə məxsus daşınmaz və daşınar əmlaklara zərər yetirərək 73.237.362 manat, 1 hüquqi şəxsə məxsus 1 daşınmaz əmlaka zərər yetirərək 285.946,87 manat, 11 hüquqi şəxsə məxsus sahibkarlıq obyektlərinə (o cümlədən avadanlıq, alət və digər inventarlara) zərər yetirərək 60.205 manat olmaqla, ümumilikdə 12 hüquqi şəxsə məxsus daşınmaz və daşınar əmlaklara zərər yetirərək 346.151 manat olmaqla nəticədə xüsusi mülkiyyət üzrə ümumilikdə 3.577 fiziki və hüquqi şəxslərə məxsus daşınmaz və daşınar əmlaklara zərər yetirərək 73.583.514 manat olmaqla, ümumilikdə, Gəncə şəhəri ərazisində 21 sayda dövlət mülkiyyətinə, 3.565 fiziki şəxsə və 12 hüquqi şəxsə ümumilikdə xüsusilə külli miqdar təşkil edən 87.710.196 manat məbləğində qəsdən maddi ziyan vurulmuşdur.