Ekspertin sözlərinə görə, verilən qərarda hərbçiyə ayrılmış sahənin həcmi, evin hansı ərazidə olmasının də rolu var. Çünki bəziləri Bakıdan kənar yaşayış məntəqələrində evlə təmin edilirlər:

“Hətta ailə üzvlərinin sayı, uşaqların cinsi də qərarda nəzərdə tutulur. Əgər uşaqlar oğlan və qızdırsa, hər birinə ayrıca otaq ayrılır, əgər iki qız və yaxud iki oğlandırsa, onda bir otaq ayrılır. Fərdi şəkildə komissiya tərəfindən buna baxılır, qərar qəbul edilib təsdiq üçün yuxarı komandanlığa göndərilir və hərbçilər evlə təmin edilirlər. Hərbçi demək olar ki, daim xidmətdə olur və onun ailəsinin yaşayışla təmin edilməsi çox vacib sosial yanaşmadır, bilavasitə onun xidmətinə mənəvi-psixoloji durumuna təsir edən amildir. Ona görə də Milli Məclisdə də bu məsələ tez tez səsləndirilir. Dünyanın hər yerində hərbçilərlə bağlı özəl yanaşmalar mövcuddur”.

Ş.Ramaldanov qeyd edib ki, 20 il qüsursuz xidmət edən hərbçi hətta təqaüdə çıxsa da, bu amillər mövcudluğunu itirmir:

“Yəni hərbçi evlə təmin edilənə qədər digər sosial yanaşmalar, kirayə pulunun verilməsi davam edir. Hərbçiyə evin verilməməsi isə komissiyanın özünün qəbul etdiyi fərdi qərarlardan asılıdır. Qanunda nəzərdə tutulub ki, hər bir hərbçi evlə təmin edilməlidir və mülkiyyətə evin verilməsi də bunun tərkib hissəsidir. Əgər 20 il qüsursuz xidmət edibsə, ona bu qanun şamil olunur. Ancaq xidmət dövründə qüsuru olan hərbçilər adətən bu kateqoriyaya düşmürlər. Bunlar fərdi şəkildə komissiya tərəfindən öyrənilir və qərar qəbul edilərək yuxarı komandanlığa təqdim olunur. Hətta hərbçilərin kompakt yaşaması üçün müəyyən yerlər ayrılıb və orada hərbçilər üçün evlər tikilir. Yəni adətən hərbçilərin həyatı bir-birinə oxşardır və xidmət etmiş təqaüdçülərin bir yerdə kompakt yaşayıb qonşuluq etməsinin də müəyyən müsbət cəhəti var. Digər tərəfdən isə, əgər təcili hadisə baş verərsə, xidmətdə olan hərbçilərin kompakt yaşadığı şəhərcikdən nəqliyyatla hərbi hissələrə və qurumlara çatdırılması da daha uyğundur”.

Sevinc İbrahimzadə / Metbuat.az