Play Store

Azərbaycan nəşrləri Budapeşt Beynəlxalq Kitab Festivalında nümayiş olunur

Azərbaycan nəşrləri Budapeşt Beynəlxalq Kitab Festivalında nümayiş olunur
19:28 23 Aprel 2015
Ölkə mətbuatı
A- A+


Bakı, 23 aprel, AZƏRTAC
Azərbaycanın Mədəniyyət və Turizm Nazirliyinin təşkilatçılığı və Macarıstandakı səfirliyimizin dəstəyi ilə Budapeşt şəhərində keçirilən XXII Beynəlxalq Kitab Festivalında ölkəmizdə nəşr olunan çap məhsullarından ibarət milli stend nümayiş olunur.
Kitab festivalda ölkəmizi Mədəniyyət və Turizm Nazirliyinin, Nazirlər Kabineti yanında Tərcümə Mərkəzinin (ATM) əməkdaşlarından ibarət nümayəndə heyəti təmsil edir.
Nazirlikdən AZƏRTAC-a bildirilib ki, festivalda Azərbaycan mədəniyyətinə, tarixinə, Dağlıq Qarabağ həqiqətlərinə, turizm potensialına və birinci Avropa Oyunlarına dair 200 adda nəfis tərtibatda, yüksək məzmuna malik ingilis, rus, ərəb dillərində nəşr məhsulları və səfirliyin dəstəyi ilə macar dilində çap olunmuş kitablar sərgilənir.
Ziyarətçilərə ölkəmiz və birinci Avropa Oyunları haqqında müfəssəl məlumatlar verilir.
Festival çərçivəsində Macarıstandakı səfirliyimizin təşkilatçılığı ilə Eötvös Lorand adına Macarıstan Dövlət Elmi Universitetinin “Humanitar elmlər” fakültəsinin türkologiya bölməsinin tələbələri ilə Azərbaycan nümayəndə heyətinin görüşü keçirilib.
Görüşdə fakültənin dekanı, professor Rudolf Sardi Azərbaycan nümayəndə heyətini salamlayaraq mədəni əlaqələrin və tərcümə sahəsinin əhəmiyyətindən söz açaraq deyib: “Bakı - Qafqaz regionunun mədəni qovşağıdır. Biz istərdik ki, Azərbaycan və Macarıstan respublikaları arasında mədəni və ədəbi əlaqələr möhkəmlənsin”.
Daha sonra Azərbaycanın Macarıstandakı səfiri Vilayət Quliyev hər iki ölkə arasındakı mədəni və ədəbi əlaqələrdən danışıb. “Bu zalda Azərbaycan ədəbiyyatı ilə maraqlanan tələbələr toplaşıb. Səfirliyimiz tərəfindən Azərbaycan ədəbiyyatına aid 50-dən çox kitab macar dilində nəşr olunub. Bu kitabların əksəriyyəti Azərbaycan mədəniyyəti, incəsənəti, ədəbiyyatı, folkloru, elmi ilə bağlıdır. Çap olunmuş həmin nəşrlərdən “Azərbaycan nağılları”nın, klassiklərimizin əsərlərinin adlarını çəkmək olar. Səfirlik 2012-ci ildə “Biz Azərbaycan haqqında nə bilirik?” mövzusunda müsabiqə elan etmişdir. Həmin müsabiqəyə mətn göndərən tələbələrin esseləri kitab halında çap olundu və qalib olan 6 müəllif bir həftəlik Azərbaycana göndərildi. Biz belə tədbirlərin keçirilməsini davam etdirəcəyik”,- deyə diplomat vurğulayıb.
Macarıstanın müstəqilliyimizi tanıyan ilk dövlətlərdən biri olduğunu deyən Mədəniyyət və Turizm Nazirliyinin sektor müdiri Lətifə Məmmədova əlaqələrimizin tarixi köklərinin qədim dövrlərə gedib çıxdığını söyləyib.
Ölkələrimiz arasında əlaqələrin daha çox mədəniyyət, ədəbiyyat və təhsil sahəsində inkişaf etdiyini söyləyən natiq hazırda bir çox azərbaycanlı tələbələrin Budapeştin təhsil ocaqlarında oxumağa böyük maraq göstərdiyini bildirib.
O, deyib: “Azərbaycanda Macarıstan mədəniyyəti günləri keçirilib. Tədbir iştirakçıları Macarıstanın turizm potensialı, iqtisadiyyatı və mədəniyyəti ilə yaxından tanış olublar. Macar musiqisi və rəqsləri Bakıda böyük maraqla qarşılanıb. Bu ilin iyun ayında Azərbaycanda birinci Avropa Oyunları keçiriləcək və biz sizləri həmin oyunlarda iştirak etməyə dəvət edirik”.
Daha sonra ATM-ın mütəxəssisi Cavidan Ağayev Azərbaycan Respublikası Nazirlər Kabineti yanında Tərcümə Mərkəzinin fəaliyyəti barədə məruzə ilə çıxış edib.


Xəbərin orijinal ünvanı: http://azertag.az/xeber/Azerbaycan_nesrleri_Budapest_Beynelxalq_Kitab_Festivalinda_numayis_olunur-849225

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)
Загрузка...

RƏYLƏR

BU KATEQORİYADAN DİGƏR XƏBƏRLƏR