Bunu APA-ya açıqlamasında Azərbaycan Xalq Cəbhəsi Partiyasının (AXCP) sədr müavini, Milli Şuranın üzvü Razi Nurullayev deyib.
R. Nurullayev AXCP-nin qurultaya hazırlıq məsələsinə toxunaraq xatırladıb ki, partiyanın qurultayı keçən il keçirilməli idi, lakin müəyyən səbəblərdən təxirə salınıb. O bildirib ki, qurultayın dəqiq tarixi regionlarda təşkil edilən konfransların keçirilmə sürətindən asılıdır: “Bütün hallarda çalışacağıq ki, bu il üçün partiyanın qurultayını keçirək”.
R. Nurullayev bu il Azərbaycanda keçiriləcək parlament seçkilərində AXCP-nin Milli Şura formatında iştirak edəcəyini vurğulayıb: “Partiya sədri Əli Kərimli də bildirib ki, ümumi prinsip hələ ki AXCP-nin Milli Şuranın tərkibində ölkədə keçiriləcək parlament seçkilərində iştirak etməsidir. Buna görə də, məqbul variant Milli Şura formatında seçkilərə qatılmaq ola bilər. Çünki xalqın və beynəlxalq aləmin qəbul etdiyi qurum Milli Şuradır. Yəqin ki, indiki məqamda AXCP-nin Milli Şuradan kənar birliklərdə təmsil olunması müzakirə oluna bilməz”.