Hələ Mehman Hüseynov məsələsi gündəmə gətirildiyi ilk
günlərdə bunun Azərbaycana qarşı yeni hücum planı olduğunu və
məqsədin heç də həbsdə olan birinin azadlığa çıxmaq olmadığını
deyirdik. Avropa Parlamentinin qəbul etdiyi qətnamə ilə bağlı
ortaya çıxan faktlar da bunu təsdiq etdi. Məlum oldu ki, bu qətnamə
Avropa strukturlarında yuva salmış erməni lobbisi və sorosçuların
(bu iki qrup məsələ Azərbaycan olanda həmişə birləşirlər)
Azərbaycana qarşı birgə planıdır.
Qətnamənin həmmüəlliflərindən olan AP üzvü, Avronest Parlament
Assambleyasının həmsədri Rebekka Harmsın (Almaniya, Yaşıllar qrupu)
kimliyi məsələyə aydınlıq gətirmək baxımından əhəmiyyətli detaldır.
Rebekka Harms daim Azərbaycana qarşı məkrli oyunlar quran, dünyada
“inqilabların atası” olaraq tanınan Corc Sorosun təsiri altında
olan şəxsdir. O, özü bunu gizlətmir və “qoca inqilabçı”nın təmsil
olunduğu platformalarda onunla foto obyektlərə poz verir.
Cors Soros vaxtilə müxtəlif fondlar və institutlar vasitəsilə
Azərbaycanda fəaliyyət göstərir, ölkənin daxili işlərinə birbaşa,
çağırılmamış qonaq kimi burnunu soxurdu. Bakı buna sonuna qədər
dözümlü yanaşdı, nəhayət, hər şeyin sonu olduğu kimi Sorosun
Azərbaycan “macəralarının” da sonu gəldi. Bundan sonra onun
qisasçılıq hissi ilə geridönüşü gözlənilən idi. Lakin o, son təması
qurmadan buna getmək istəmədi və 2015-ci ildə Davosda Azərbaycan
Prezidenti İlham Əliyevlə görüşdü. Yayılan məlumatlara görə, dövlət
başçısından Azərbaycanda fəaliyyətinin bərpa etməyi xahiş edib və
razılıq alıb. Lakin bir şərtlə: ölkənin daxili işlərinə
qarışmayacaq. Bu C. Sorosa sərf etmədi və həmin görüşdən dərhal
sonra Azərbaycanla bağlı tənqidi bəyanat yaydı. Qoca “inqilabçı”
qisasa başlamışdı. Həmin vaxtdan Azərbaycana qarşı bütün hücumların
arxasında onun “ağ başını” görmək mümkündür, hətta artıq bu adi
hala çevrilib. Sorosun Avropa Şurası Parlament Assambleyasında
erməni nümayəndələri ilə birlikdə Azərbaycana qarşı intensiv
hücumları da onun “qisas” kampaniyasının bir hissəsi idi. AŞPA-dakı
sorosçuların bir neçəsinin adını da çəkə bilərik:
“Avropa sabitlik təşəbbüsü” (YEİS) təşkilatının rəhbəri
olan Cerald Knaus;
Almaniya Xristian-demokrat ittifaqı (XDS) Kristofer Ştrasser;
Niderland siyasətçi Piter Omtzixt;
SDP üzvü (Almaniyanın Sosial-Demokrat Partiyası) Frank Şvab;
Fransız deputatlar Rene Ruke və Fransua Roşblaun (Roşblaun həm də
Fransa-Ermənistan dostluq qrupunun üzvüdür) və
başqaları;
Görünür, Mehman Hüseynov məsələsi Corc Soros və onun ermənipərəst
komandası üçün Azərbaycana qarşı yeni hücum imkanı oldu, lakin
müzakirələr zamanı baş verənlər özləri üçün ciddi biabırçılıqla
nəticələndi.
Rebekka Harms ilk çıxışçı kimi kürsüyə qalxdı və ilk yalanını
danışdı. Bildirdi ki, məsələ ilə bağlı azərbaycanlı həmkarları ilə
təmaslar qurmağa çalışıb. Hərçənd, Avropa Parlamentində keçirilən
təcili dinləmələrlə bağlı nə Milli Məclisə, nə Azərbaycan Xarici
İşlər Nazirliyinə, nə də Azərbaycanın Brüsseldəki səfirliyinə hər
hansı müraciət daxil olmadığı bildirilir. Müzakirələrdə çıxış edən
Avropa İttifaqının Ticarət Komissarı Sesilia Malstrom
(müzakirələrdə iştirak edən Aİ-nin ən yüksək səviyyəli rəsmisi) öz
nitqində Aİ-nin məsələni yaxından izlədiyini və Azərbaycan
Hökumətinin bu məsələdə əməkdaşlıq etdiyini vurğuladı və qeyd etdi
ki, Aİ diplomatik nümayəndələri Hüseynova baş çəkiblər, o aclıq
aksiyasını dayandırıb və səhhətinə ciddi təhlükə yaradan vəziyyət
yoxdur.
Aİ-nin yüksək səviyyəli rəsmisinin bu çıxışı Mehman Hüseynovun
qardaşı Emin Hüseynovu təşvişə saldı. Emin Hüseynovun qətnamə üzrə
səsvermədən az öncə AP üzvlərinə elektron məktub ünvanlamayıb.
Məktubunda komissar Malstromun çıxışında M.Hüseynovun aclıq
aksiyası keçirmədiyi sözlərindən böyük peşmançılıq keçirdiyi hiss
edilən qardaş Hüseynov özü bunu “şok oldum” kimi yazır. Maraqlıdır
o, yüksək səviyyəli Aİ rəsmisinin həqiqəti dilə gətirəcəyini
gözləmədiyi üçün şok keçirdib, yoxsa Mehman Hüseynovun əldə olunmuş
razılığa əməl etmədiyindən dərin məyusluq keçirib?!
Strasburqa AP üzvləri ilə görüşlər keçirərək hər kəsi sifariş
əsasında qurduqları şou-ya inandırmağa çalışan Emin Hüseynovun
səsvermə öncəsi deputatlara isterik şəkildə yazdığı müraciəti bir
daha onu göstərir ki, bu insanı qardaşı Mehman Hüseynovun taleyi
maraqlandırmır, o, bu oyundan əldə edəcəyi şəxsi maraqlarını güdür
və onun havadarlarının sifariş etdiyi musiqini ifa edir.
Qətnamənin qəbulunda diqqət çəkən əsas məqamlardan biri isə
Ermənistan mediasının “sevincli” xəbərləridir. Qətnamə ilə bağlı
ilk məlumatı da erməni mediası tirajladı. Əslində bu oyunun
arxasında erməni lobbisinin olduğunu nəzərə alsaq, erməni
mediasının qətnamənin qəbul ediləcəyi haqqında öncədən xəbərlərinin
olduğu məlum olur. Müzakirələr zamanı çıxış edən, Azərbaycanda
insan hüquqlarından dəm vuran AP üzvlərindən heç biri çıxışında
fundamental hüquqları pozulmuş 1 milyondan artıq Azərbaycanlı
qaçqın və məcburi köçkünü yada salmaması da sifarişin haradan
gəldiyinə daha bir dəlildir.
Göründüyü kimi, bütün bu prosesdə Mehman Hüseynov qurban olaraq
seçilib. Lakin bu qətnamənin kağız parçasından başqa bir şey
olmadığını avroparlamentarilər də anlayır. Çünki Azərbaycan Avropa
İttifaqının üzvü olmadığı üçün belə qətnamələrin də heç bir qüvvəsi
yoxdur. Sadəcə olaraq, ortada Azərbaycana qarşı uzun illərdir
müşahidə olunan ikilistandartların olması və Avropa strukturlarının
ikiüzlülüklərini davam etdirməsidir.
Prezident İlham Əliyev hələ 2015-ci ildə AP-nin Azərbaycana qarşı
qəbul etdiyi qətnamədən danışarkən Azərbaycana qarşı qərəzli
münasibəti belə şərh etmişdi: “Biz bilirik ki, bunun
arxasında hansı qüvvələr dayanır. Bu qüvvələr bundan əvvəl
dəfələrlə Azərbaycana qarşı əsassız ittihamlar irəli sürmüşlər,
bizi şantaj etmişlər. Onların yeganə məqsədi ondan ibarətdir ki,
inkişafda olan, müasir, müstəqil siyasət aparan, tolerant,
multikulturalizmin məkanı olan Azərbaycanı ləkələsinlər, gözdən
salsınlar və Avropada Azərbaycan haqqında yanlış, tamamilə həqiqətə
zidd bir rəy yaratsınlar. Burada əlbəttə ki, biz erməni lobbisinin
rolunu da görürük və hesab edirəm ki, Avropanın müvafiq hüquq
mühafizə orqanları Avropa Parlamentinin bəzi üzvləri ilə erməni
lobbiçiləri arasındakı gizli əlaqələri də araşdırsalar pis
olmaz”.
Azərbaycan bu gün milli maraqları çərçivəsində istənilən dövlət,
beynəlxalq təşkilatla bərabərhüquqlu, konstruktiv əməkdaşlıq etməyə
hazırdır, lakin Prezident İlham Əliyevin dediyi kimi, heç bir halda
təzyiq və diktat metodları qəbul etmir, bundan sonra da qəbul
etməyəcək.
Publika.az
