Meksika səfiri: "Azərbaycan idman tədbirlərinin təşkilində böyük təcrübəyə malikdir" - FOTO

Meksika səfiri: "Azərbaycan idman tədbirlərinin təşkilində böyük təcrübəyə malikdir" - FOTO
17:52 16 Fevral 2019
49 İdman
Ölkə mətbuatı
A- A+

Azərbaycan idman tədbirlərinin təşkilində böyük təcrübəyə malikdir.

Milli.Az bildirir ki, bunu Trend-ə Meksikanın Azərbaycandakı səfiri Xuan Rodriqo Labardini Flores deyib.

Səfir qeyd edib ki, Azərbaycanda 2015-ci il Avropa Oyunları, 2017-ci il İslam Həmrəyliyi Oyunları kimi vacib idman tədbirləri təşkil olunub:

"Bu gün Bakıda batut gimnastikası və tamblinq üzrə Dünya Kuboku keçirilir. Bu yarışda Meksika komandası da iştirak edir. Onlar 2020-ci ildə Tokioda keçiriləcək Yay Olimpiya Oyunlarına vəsiqə qazanmaq üçün əllərindən gələni edəcək".

Səfirin sözlərinə görə, Azərbaycanla Meksika təkcə siyasi, iqtisadi və mədəni sahələrdə deyil, həm də idman sahəsində əlaqələri inkişaf etdirmək niyyətindədir:

"Biz Azərbaycanla idman sahəsində əməkdaşlığı genişləndirmək istəyirik. Burada gimnastika, güləş, taekvondo kimi idman növləri inkişaf edib və münasibətlərin genişlənməsi üçün imkanlar var".

Qeyd edək ki, Bakıda batut gimnastikası və tamblinq üzrə ilin ilk Dünya Kuboku keçirilir. Turnirdə 30 ölkədən 160-dan çox gimnast iştirak edir.

Tokio Olimpiya Oyunlarına təsnifat xarakteri daşıyan və batutçular üçün ilin ən vacib startlarından biri olan bu Dünya Kubokunda Vladislav Qonçarov, Rozanna Maklennan, Ceyson Börnett, Dun Dun, Qao Ley, Dmitri Uşakov və Peyc Brioni kimi Olimpiya ulduzları mübarizə aparır.

Azərbaycanı isə batut yarışlarında qadınlar arasında sinxron proqramda son Avropa çempionatının gümüş medalçısı Veronika Zemlyanaya, kişilər arasında sinxron və fərdi proqramlarda Ruslan Ağamirov, İlya Qrişunin, Oleq Piunov və tamblinq cığırında Avropa çempionumuz (2018-ci il) Mixail Malkin təmsil edirlər.

İki gün davam edəcək yarışların ilk günü təsnifat mərhələləri keçirilir, ikinci gün isə final mərhələləri baş tutacaq.

Turnirdə ən yüksək icra xalını toplamış gimnastlara ənənəvi "AGF Trophy" Kuboku da təqdim olunacaq.

2019 və 2020-ci illərdə Tokio Olimpiya Oyunlarına batut gimnastikası üzrə təsnifat xarakterli 6 Dünya Kuboku keçiriləcək. Paytaxtımız gələn il bu kuboklardan daha birinə də ev sahibliyi edəcək.

Xatırladaq ki, ötən il Bakıda 26 ölkənin iştirakı ilə gimnastikanın bu növü üzrə Avropa çempionatı, daha öncəki illərdə isə Dünya kubokları (2016-cı il 17 ölkə, 2017-ci il 15 ölkə) keçirilib.

Milli.Az 


Xəbərin orijinal ünvanı: https://news.milli.az/sport/731227.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)
Загрузка...

RƏYLƏR

BU KATEQORİYADAN DİGƏR XƏBƏRLƏR