Yarımkeçiricilər Sənayesi Assosiasiyası (Semiconductor Industry Association, SIA) cari ilin ilk rübü üçün dünya yarımkeçirici məhsullar bazarının qiymətləndirməsini aparıb.
Milli.Az ICTnews-a istinadən bildirir ki, məlumata görə, yanvar-martda satış həcmi təxminən 96,8 milyard dollar təşkil edib. Bu, ötən ilin sonuncu rübü ilə müqayisədə 15,5 faiz, 2018-ci ilin ilk rübünə nisbətdə isə 13,0 faiz azdır.
Martda qlobal miqyasda yarımkeçirici məhsullara tələbat pul ifadəsində 32,3 milyard dollara bərabər olub. Qeyd edək ki, bir il əvvəl bu göstərici 37,1 milyard dollar təşkil edib. Beləliklə, tədarük həcmində 13 faiz azalma qeydə alınıb.
Martın yekunları üzrə tələbatın azalması bütün bazarlarda müşahidə edilib. Belə ki, ABŞ regionunda pul ifadəsində tədarük həcmi 26,6 faiz azalıb. Yaponiyada azalma 11,1 faiz, Avropada isə 6,8 faiz təşkil edib. Çin və Asiya-Sakit okean regionunda satışların azalması 9,4 və 9,3 faiz səviyyəsində olub.
Assosiasiyanın statistikası dünya informasiya texnologiyaları bazarının inkişafının zəifləməsindən xəbər verir. Bununla belə, yarımkeçirici məhsulların satış həcminin yaxın rüblər ərzində yenidən artacağı istisna edilmir.
Milli.Az
