Bakı, 12 may, AZƏRTAC
Azərbaycan Milli Elmlər Akademiyasının Mərkəzi Elmi Kitabxanasında (MEK) Avropa Herontologiya və Heriatriya Assosiasiyasının prezidenti, Rusiya Tibb Elmləri Akademiyasının (RTEA) Sankt-Peterburq Biotənzimləmə və Herontologiya İnstitutunun direktoru, RTEA-nın müxbir üzvü, professor V.Xavinson və Rusiya Antiqocalma Təbabəti Cəmiyyətinin prezidenti, tibb elmləri doktoru, professor S.Trofimova ilə görüş keçirilib.
MEK-dən AZƏRTAC-a bildiriblər ki, tədbirdə AMEA-nın Fiziologiya İnstitutu ilə Rusiya Elmlər Akademiyasının Herontoloji Cəmiyyəti, İ.P.Pavlov adına Fiziologiya İnstitutu, Sankt-Peterburq Biotənzimləmə və Herontologiya İnstitutu arasında “Qocalmanın fiziologiyası” sahəsində əməkdaşlıq haqqında müqavilə imzalanıb.
Tədbirdə AMEA-nın Fiziologiya İnstitutunun direktoru, biologiya elmləri doktoru Ulduz Həşimova Azərbaycanda herontoloji tədqiqatların müasir vəziyyəti və inkişaf perspektivləri barədə məlumat verib.
Sonra herontologiya və heriatriya sahəsində tanınmış alimlər elmi məruzələrlə çıxış ediblər. Professor V.Xavinsonun “İnsanın həyat fəaliyyəti resurslarının genişləndirilməsi perspektivləri” və professor S.Trofimovanın “Vaxtından əvvəl qocalmanın müasir diaqnostikası və antiqocalma texnologiyaları” mövzusunda çıxışları iştirakçılar tərəfindən maraqla qarşılanıb. Alimlər herontologiya sahəsində problemlərin respublikamız üçün böyük əhəmiyyət kəsb etdiyini və müvafiq tədqiqatlar üçün Azərbaycanda unikal baza olduğunu qeyd ediblər.
