Ötən il Bakıda prokurorluq tərəfindən 210, daxili işlər orqanları tərəfindən isə 4517 cinayət işinin istintaqı yekunlaşıb

16:17 16 Yanvar 2015
91 Digər
Ölkə mətbuatı
A- A+

[ 16 Yanvar 2015 16:14 ]


Bakı. Fuad Cəfərov- APA. Ötən  il Bakıda prokurorluq tərəfindən 210, daxili işlər orqanları tərəfindən isə 4517 cinayət işinin istintaqı yekunlaşıb.

Bu barədə Bakı Şəhər Prokurorluğunda keçirilən geniş əməliyyat müşavirəsində bildirilib. Bakı Şəhər Prokurorluğundan APA-ya verilən məlumata görə, müşavirədə qeyd olunub ki, şəhər prokurorluğu orqanları tərəfindən ibtidai araşdırmaya prosessual rəhbərlik əsasən düzgün təşkil edilib, bu sahədə tələbkarlıq daha da artırılıb, istintaq və təhqiqatın tam, hərtərəfli və obyektiv aparılmasına nəzarət gücləndirilib:  

"Görülmüş müsbət işlərin nəticəsidir ki, il ərzində prokurorluqda 210, daxili işlər orqanlarında isə 4517 cinayət işinin istintaqı tamamlanıb. Paytaxtın prokurorluq və digər hüquq-mühafizə orqanlarının birgə həyata keçirdiyi istintaq və əməliyyat-axtarış tədbirləri nəticəsində qeyri-aşkar şəraitdə törədilmiş qəsdən adam öldürmə, quldurluq cinayətlərinin, bağlı qalmış ölümlə nəticələnən yol nəqliyyat hadisələrinin açılması, narkotik vasitə və psixotrop maddələrin qanunsuz dövriyyədən çıxarılması və bir sıra digər qanun pozuntularının qarşısının alınması təmin edilib.

Belə ki, Yasamal rayonunda Xoşavaz Mənəfovanın və Vahid Əhmədovun, Nərimanov rayonunda Mikayıl Əsədovun, Güllərə Qurbanovanın Suraxanı rayonunda, İltifat Mehralıyevin isə Sabunçu rayonunda qeyri-aşkar şəraitdə qəsdən öldürülmələri cinayətlərinin açılması təmin edilərək təqsirkar şəxslər məsuliyyətə cəlb olunublar".

Müşavirədə o da bildirilib ki, həyata keçirilən qabaqlayıcı-profilaktik tədbirlər nəticəsində ötən illə müqayisədə baş verən ölümlə nəticələnən yol nəqliyyat hadisələri azalıb. Hadisə yerindən qaçan sürücülərin şəxsiyyətinin müəyyən edilməsi istiqamətində müsbət nəticələr əldə edilərək bağlı qalmış cinayətlərin sayında da azalma müşahidə edilib. Həmçinin, müşavirədə bu sahədə mövcud olan çatışmazlıqların və yol verilmiş qanun pozuntularının vaxtında aşkar edilib, aradan qaldırılması üçün bütün zəruri tədbirlərin görülməsi hər bir əməkdaşdan  tələb edilib.

 

 

RƏYLƏR

BU KATEQORİYADAN DİGƏR XƏBƏRLƏR