Türkiyə ABŞ bazalarını ölkə hüdudlarından çıxarmaq istəsə, Yunanıstan məmnuniyyətlə bu bazalara ev sahibliyi edə bilər.
Publika.az xəbər verir ki, bu təklif Yunanıstanın Xarici İşlər Nazirliyindən gəlib.
Bildirilib ki, “İncirlik” və “Kürəcik” hərbi bazaları üçün Yunanıstanda kifayət qədər yer var: “Biz NATO ölkəsiyik, ona görə də hər cür xidməti göstərə bilərik. ABŞ-la həm də müdafiə sənayesi üzrə müqaviləmiz var.
Yunan diplomat “İncirlik”də olduğu iddia edilən nüvə silahlarını qəbul edib-edə bilməyəcəkləri sualına belə cavab verib: “ABŞ-ın bu geniş bölgədə taktiki nüvə silahı yerləşdirmə imkanına sahib sadəcə iki bazasının olduğunu hamımız bilirik. Amma bu silahın harada olduğunu təsdiq edə bilmərəm”.
Qeyd edək ki, Türkiyənin Xarici işlər naziri Mövlud Çavuşoğlu Türkiyənin Rusiyadan aldığı S-400 komplekslərinə görə ABŞ-ın sanksiyalarına məruz qalması təqdirində Ankaranın “İncirlik” və “Kürəcik” bazalarını bağlaya biləcəyini dilə gətirmişdi.
