AQTA bayram günlərində ictimai-iaşə obyektləri və satış müəssisələrində reydlər keçirib

AQTA bayram günlərində ictimai-iaşə obyektləri və satış müəssisələrində reydlər keçirib
14:08 5 Yanvar 2020
46 Digər
Ölkə mətbuatı
A- A+

Bakı. Trend:

Azərbaycan Qida Təhlükəsizliyi Agentliyi (AQTA) bayram günlərində ictimai-iaşə obyektləri və satış müəssisələrində mütəmadi reydlər keçirib.

Trend-in məlumatına görə, bu barədə Agentliyin İctimaiyyətlə əlaqələr sektorunun müdiri Aysel Fərziyeva bildirib.

Onun sözlərinə görə, Azərbaycanda bayram ərəfəsində kustar üsulla spirtli içki hazırlayıb insanların sağlamlığı və həyatı bahasına qazanc əldə etməyə çalışan cinayətkarlara rast gəlinir: "Ötən həftə vətəndaşlarımızı bayram günlərində diqqətli olmağa səslədiyimiz məsələ ilə bağlı Gürcüstanda bədbəxt hadisələr yaşanıb. Bayram günlərində vətəndaşlarımızın ən çox üz tutduğu ölkələrdən biri olan Gürcüstanda kustar üsulla hazırlanmış spirtli içkilərdən kütləvi zəhərlənmə halları artıb. Yerli mətbuatın məlumatına görə, dekabrın 31-dən yanvarın 3-dək xəstəxanalara 1254 müraciət daxil olub ki, onlardan 844-ü spirtli içkilərdən zəhərlənmə ilə əlaqədardır. Bu kimi hallarla bağlı bayram günlərində də əməkdaşlarımız tərəfindən ictimai-iaşə obyektləri və satış müəssisələrində mütəmadi reydlər keçirilib və aşkarlanan faktlarla bağlı qanunmüvafiq tədbirlər görülüb. Aparılan reydlər və görülən tədbirlər barədə qarşıdakı günlərdə ətraflı məlumat verəcəyik. Bu kimi faciəvi hallarla rastlaşmamaq üçün diqqətli olmaq lazımdır. Ucuz olduğu üçün bu içkiləri istifadə etməyi düşünənlər bunun özləri və yaxınları üçün faciə ilə nəticələnəcəyini bilməlidirlər".

Agentlik rəsmisi bu cür hallarla qarşılaşan vətəndaşlara müraciət edib: "Özümüzü və ətrafımızdakı insanları bu cür dələduzların qeyri-insani əməllərindən qorumaq üçün ehtiyatlı olmalıyıq. Belə qanunazidd hallarla üzləşdikdə Qida Təhlükəsizliyi Agentliyinin “1003 – Çağrı mərkəzi”nə məlumat vermək lazımdır. Eyni zamanda hər bir istehlakçı ictimai iaşə, satış və digər məkanlardan qida məhsulları alarkən məhsulun qablaşdırmasına, etiket məlumatlarına diqqət yetirməli və məhsulların mənşə sənədlərini tələb etməlidir".

Trend-in ən mühüm və maraqlı xəbərlərini "Telegram"da izləyin


Xəbərin orijinal ünvanı: https://az.trend.az/azerbaijan/gundem/3173097.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR