Bu gecə paytaxtda 3 yaşlı qız ailə üzvlərinə həyəcanlı anlar yaşadıb. APA TV-nin məlumatına görə ,o, sağ əlini ehtiyatsızlıq ucbatından az qala itirməli olacaqmış. Hadisə İnşaatçılar prospekti 20 a, mənzil 103-də qeydə alınıb. Anasından xəbərsiz elektrik ətçəkən maşını işə salan 3 yaşlı Rüqayyə Seyidzadənin sağ əlini maşın əzib. Körpənin əlini ətçəkən maşından çıxara bilməyən ailə üzvləri onu Elmi-Tədqiqat Travmatologiya İnstitutuna çatdırıblar. Həkimlərin müdaxiləsi nəticəsində uşağın əli ət maşınından çətinliklə də olsa çıxarılıb. Balaca qıza sağ əlin bütün barmaqlarının əzilmiş, didilmiş yarası, əsas falanqaların səviyyəsinə qədər 1-ci və 4 cü barmaqların natamam amputasiya diaqnozu qoyulub və reanimasiya şöbəsinə yerləşdirilib. Xəstəxanadan verilən məlumata görə hazırda qızcığazın vəziyyəti kafi olaraq qalır.
Qeyd edək ki, belə bir hadisə 2 gün bundan əvvəl Ağcabədi rayonundan paytaxta qonaq gələn 3 yaşlı Ballı Məmmədlinin başına gəlib.
