Şam yandıraq, balkona çıxaq... - Bu, həkim-deputat sözüdürmü?

Şam yandıraq, balkona çıxaq... - Bu, həkim-deputat sözüdürmü?
09:48 18 Mart 2020
109 Digər
Ölkə mətbuatı
A- A+

Aynur Camalqızı

Milli Məclisin bugünkü koronavirus müzakirəsindən açığı, daha çox şey gözləyirdim. Ən azı Ümid. Ümidlənməyə və inanmağa hamımızın ehtiyacımız var.

Deputatların, bu kontekstdə xüsusilə ixtisasca həkim olanların çox mühüm təkliflərlə çıxış edəcəyini, dünyanın, nəinki dünyanın, hətta yalnız özümüzə aid bapbalaca dünyamızın da düzənini dəyişən pandemik virusla mübarizə ilə bağlı insanlarımıza - onları parlamentə seçən seçicilərə ən vacib məsləhətləri, tövsiyələri verəcəklərini güman edirdim. Amma...

Tam əksi oldu. Bilmirəm indi gülüb keçim, ya da... Yox, gülməli deyil. Söhbət pandemiyadan gedirsə, heç nə gülməli deyil. İnsanlar kütləvi şəkildə xəstəliyə yoluxur, Avropa ölkələrində karantin elan olunur, bəşəriyyətin gələcəyi faktiki təhdid altındadır, bizim həkim-deputat Rəşad Mahmudovsa deyir ki, şam yandırın, balkona çıxın.

Bəli, balkona çıxmaq olar, şam yandırmaq da olar. Amma bunu bir həkimmi məsləhət görməlidir insanlara? İxtisasca həkim olan deputatın xalqa deməyə başqa bir sözü, ismarışı, məsləhəti yoxdurmu? Bu qədər panika, təlaş və təşviş içində olan toplumun təbib sözünə, loğman məsləhətinə nə qədər ehtiyacı var, fərqində deyilsizmi?

Bugunkü durum aydındır, bəs sabah, 4-8 həftə sonra nə ola bilər? Vəziyyət kritikləşərsə, nə etməli?

Rəşad Mahmudov bir həkim kimi, İtaliyadakı, Fransadakı, İspaniyadakı həmkarları ilə danışıbmı? Situasiya ağırlaşarsa, o da onlar kimi fədakarlıq etməyə, həyat qurtarmağa hazlrdırmı? Yaxın vaxtlarda peyvənd tapıla bilərmi? Azərbaycan səhiyyəsi nə qədər hazırlıqlıdır fövqəladə vəziyyətlərə? İnsanlar virusa yoluxmamaq üçün nə etməlidir, nələr etməməlidir?

Təəssüf ki, bəziləri daşıdığı mandatın məsuliyyətini, yükünü, çəkisini, ağırlığını qətiyyən anlamır. Konseptual yanaşma qoyulmalıydı, Nazirlər Kabineti yanında Operativ Qərargaha virusla mücadilədə “Yol xəritəsi” təklif olunmalıydı, konkret məsələlər müzakirəyə çıxarılmalıydı. Axı parlament hakimiyyətin bir qoludur. Bu çətin günlərdə niyə hakimiyyətin yanında deyilsiniz, məsuliyyəti niyə bölüşmürsüz? Bu ölkədə bütün problemlərdən çıxış yolunu yalnız Prezidentmi göstərməlidir?

Təkliflər də, ideyalar da, onların həyata keçirilmə yolları da Prezidentin dilindənmi səslənməlidir?!

Bu ölkədə növbədənkənar parlament seçkiləri ona görə keçirildi ki, İlham Əliyevin müəllifi və icraçısı olduğu kardinal islahatlar prosesinə Milli Məclis də dəstək versin. Ali qanunverici orqan icraedici orqana adekvat olsun. Budurmu nəticə? Balkona çıxaq, şam yandıraq... Bu, problemi həll edəcəkmi? Axı bunu hansısa şou proqramın aparıcısı deyə bilər, bunu bir bloger yaza bilər, ekstrasens Zirəddin Rzayev təklif edə bilər, hətta bunu misal üçün, kulinar Tahir Əmiraslanov da deyə bilər, amma bir həkim-deputatdan elmi yanaşma umurduq...

O qədər ciddi yəni... İnsani... İnsanpərvər... Üstümüzə fəlakət kimi gələn xəstəlik - pandemiya haqqında dərman kimi, ilac kimi, əlac kimi bir çıxış...


Xəbərin orijinal ünvanı: https://publika.az/news/koshe/308120.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)
Загрузка...

RƏYLƏR

BU KATEQORİYADAN DİGƏR XƏBƏRLƏR