Bakı, 30 may, AZƏRTAC
Küveytin geniş oxucu kütləsinə malik “Əl-Ray” və “Əl-Nahar” qəzetlərində Azərbaycanın bu ölkədəki səfiri Tural Rzayevin 28 May - Respublika Günü ilə bağlı məqaləsi dərc edilib.
Azərbaycanın Küveytdəki səfirliyindən AZƏRTAC-a verilən məlumata görə, məqalədə 97 il əvvəl mayın 28-də yaradılan Azərbaycan Xalq Cümhuriyyətinin müsəlman Şərqində ilk parlamentli respublika, türk və İslam dünyasında ilk demokratik, hüquqi və dünyəvi dövlət nümunəsi olduğu bildirilir.
Məqalədə XX əsrdə respublikamızın başına gətirilən müsibətlərdən, ermənilərin əsassız ərazi iddialarından da bəhs olunur. Lakin bütün bu müsibətlərə baxmayaraq, Azərbaycan Respublikasının müsəlman Şərqində ilk parlament respublikası olduğu diqqətə çatdırılır, hətta ilk dəfə məhz Azərbaycan qadınlarına parlamentdə seçib-seçilmək hüququnun verildiyi qeyd edilir.
Məqalədə Azərbaycan Respublikasının Sovet İttifaqı süquta uğradıqdan sonra, 1991-ci ildə yenidən öz müstəqilliyini elan etdiyi diqqətə çatdırılır. Həmin dövrdə ölkədə bir sıra problemlərin meydana gədiyi, iğtişaşların baş verdiyi və Azərbaycan ərazisinin 20 faizinin Ermənistan tərəfindən işğal olunduğu, nəticədə iyirmi mindən çox mülki vətəndaşın qətlə yetirildiyi, bir çox müqəddəs yerlərin, məscidlərin, tarixi abidələrin dağıdıldığı bildirilir.
Belə bir dövrdə Azərbaycan xalqının ümummilli lideri Heydər Əliyevin hakimiyyətə qayıtdığı, əvvəlcə Ermənistan və Azərbaycan arasında gedən müharibənin dayandırılması məqsədilə atəşkəsə nail olunması üçün müvafiq razılaşmanın əldə edildiyi, sonra isə qısa zamanda ölkədə iqtisadi və siyasi sahələrdə inkişafın təmin olunduğu, eləcə də sosial problemlərin həll edildiyi diqqətə çatdırılır. Bu gün Azərbaycan Prezidenti İlham Əliyevin ulu öndər Heydər Əliyevin siyasi kursunu layiqincə davam etdirdiyi vurğulanır. Eyni zamanda, Azərbaycanın sosial-iqtisadi inkişafı, respublikamızın dünyanın ən dinamik inkişaf edən ölkələri sırasına daxil edilməsi, xalqın rifahının yaxşılaşması, demokratik islahatların həyata keçirilməsi istiqamətində Prezident İlham Əliyevin gördüyü mühüm işlər qeyd edilir.
