Bu gün "Bakı-2015" I Avropa Oyunlarında suyatullanma yarışlarına 2 dəst medalın sahibi müəyyənləşəcək. Fanat.az xəbər verir ki, Bakı Su İdmanı Mərkəzində kişilər 3 metrlik sinxron tramplinlərdə, qadınlar isə 1 metrlik tramplində güclülərin adına aydınlıq gətirəcək.
Günə qadınların mübarizəsi ilə start veriləcək. Saat 10:00-da başlayacaq təsnifat mərhələsində 29 idmançı qüvvəsini sınayacaq.
Azərbaycanı bu yarışda Olqa Bıkovskaya təmsil edəcək. O, saat 20:25-də başlayacaq final mərhələsinə vəsiqə uğrunda mübarizə aparacaq. Platforma yarışlarında finala yüksəlib, 11-ci olan idmançımız daha yaxşı nəticə göstərməyə çalışacaq.
Qeyd edək ki, kişilərin sinxron tramplinlərdə ki yarışında ölkəmiz təmsil olunmayacaq.
Fanat.az
