Bakı. Musa Əhmədov – APA-Economics. “Abşeron” yatağının işlənməsi layihəsi üzrə yekun investisiya qərarı 2016-cı ildə qəbul ediləcək.
“APA-Economics”in “Praym” agentliyinə istinadən verdiyi məlumata görə, bunu jurnalistlərə açıqlamasında SOCAR prezidenti Rövnəq Abdullayev deyib. Onun sözlərinə görə, hazırda Total şirkəti yekun investisiya qərarının hazırlanması üzərində işləyir: “Yataqda ilk qaz hasilatı 2020-2021-ci illərə təsadüf edəcək. İllik hasilat təxminən 5 milyard kubmetr qaz təşkil edəcək. Daha dəqiq rəqəm gələn il məlum olacaq”.
Qeyd edək ki, SOCAR-ın qiymətləndirmələrinə görə, yatağın ehtiyatları 150-300 mlrd. kubmetr qaz təşkil edir.
Xatırladaq ki, “Abşeron” yatağının kəşfiyyatı, işlənməsi və hasilatı üzrə müqavilə 2009-cu ilin fevralında imzalanıb. Müqaviləyə əsasən, SOCAR və Total hərəsi 40%, GDF Suez isə 20%-lik paya malikdir.