Bakı, 21 yanvar, AzərTAc
Yanvarın 21-də Dini Qurumlarla İş üzrə Dövlət Komitəsinin sədri Mübariz Qurbanlı “Yehovanın Şahidləri” təşkilatının Avropa Assosiasiyasının nümayəndələri ilə görüşüb.
Komitənin mətbuat xidmətindən AzərTAc-a bildiriblər ki, görüşdə təşkilatın Avropa Assosiasiyasının nümayəndələri Mark Hanson, Vasili Kalenlə yanaşı, yerli icmanın təmsilçiləri də iştirak ediblər.
Qonaqlar Assosiasiyanın fəaliyyəti ilə bağlı məlumat veriblər. Bildiriblər ki, qurum Avropa məkanında geniş fəaliyyət göstərir.
Dövlət Komitəsinin sədri Mübariz Qurbanlı deyib ki, Azərbaycanda vətəndaşların dini etiqad azadlığı təmin olunub. Ölkədə zərərli dini ideyalar yaymayan, dinlərarası münasibətlərə xələl gətirəcək fəaliyyət göstərməyən bütün dini konfessiyaların fəaliyyətinə şərait yaradılıb.
