[ 23 Yanvar 2015 14:46 ]
Moskva. Fərid Əkbərov - APA. Sankt-Peterburqun qubernatoru Georgi Poltavçenko şəhər küçələrindən birinə Çeçenistanın sabiq prezidenti Əhməd Kadırovun adının verilməsinə qarşı çıxıb.
APA-nın Rusiya bürosunun xəbərinə görə, bu barədə G.Poltavçenko Sankt-Peterburq qanunvericilik məclisinin deputatı Vitali Milonovun sorğusuna cavabında bildirib.
"Əhməd Hacı Kadırovun şəxsiyyətinə olan hörmətə baxmayaraq, etiraf etmək lazımdır ki, o, Sankt-Peterburqun həyatında iştirak etməyib, bizim şəhərdə yaşamayıb və işləməyib. Şəhərin toponimiya komissiyasının prinsipi ondan ibarətdir ki, küçələr o zaman dahi şəxsiyyətlərin şərəfinə adlandırılır ki, həmin şəxslərin həyatı və yaradıcılığı şəhərimizin tarixi ilə əlaqəli olsun", - deyə Sankt-Peterburq qubernatoru bildirib.
Buna baxmayaraq, G.Poltavçenko Smolnının mədəniyyət üzrə komitəsinə Sankt-Peterburqda yerləşən obyektlərdən birinə Əhməd Kadırovun adının verilməsi məsələsinə baxılmasını tapşırıb.
