Bakı. Anaxanım Hidayətova – APA. Azərbaycanın Serbiyadakı səfiri Eldar Həsənov bu ölkənin baş naziri Aleksandr Vuçiçlə görüşüb. APA-nın Serbiya hökumətinin saytına istinadən verdiyi xəbəra görə, görüş zamanı tərəflər Bakı və Belqrad arasında mövcud olan siyasi və iqtisadi əməkdaşlığı müzakirə ediblər.
E. Həsənov A. Vuçiçi Azərbaycana rəsmi səfərə dəvət edib. Diplomat Serbiyanı Balkan regionunda sabitlik və sülh məkanı adlandırıb. Tərəflər Azərbaycan şirkətlərinin Serbiyanın yeni infrastruktur layihələrində mümkün iştirakını və kənd təsərrüfatı sahəsində əməkdaşlığın intensivləşməsi yolları barədə fikir mübadiləsi aparıblar. Baş nazirinin səfərinin yekununda Azərbaycan-Serbiya biznes forumunun keçirilməsi nəzərdə tutulub.