Bakı, 6 avqust, AZƏRTAC
"Admiralteyskaya muzıka" XVI Beynəlxalq Festival çərçivəsində sentyabrın 20-də P.Çaykovski adına Moskva Dövlət Konservatoriyasının böyük zalında "Çaykovski-qala" konserti təqdim olunacaq.
AZƏRTAC Moskva Dövlət Konservatoriyasının saytına istinadla xəbər verir ki, konsertin proqramına M.V.Lomonosov adına Moskva Dövlət Universitetinin akademik xorunun çıxışı da daxil edilib. Xorun bədii rəhbəri və baş dirijoru həmvətənimiz, Rusiyanın əməkdar mədəniyyət işçisi Mirzə Əsgərovdur.
Qeyd edək ki, M.Əsgərov əslən Bakıdan olsa da, valideynləri Dərbəndə köçdüyü üçün bu şəhərdə dünyaya gəlib.
M.V.Lomonosov adına Moskva Dövlət Universitetinin akademik xoru onun rəhbərliyi altında beynəlxalq festival və müsabiqələrin iştirakçısı olub, bir sıra diplomlara layiq görülüb.