ABŞ-ın aviaşirkətləri ölkənin şimal-şərq sahilinə doğru güclü qar tufanının yaxınlaşmasına görə mindən çox hava reysini ləğv edib.
ANS PRESS-in məlumatına görə, Amerikanın hava nəqliyyatı şirkətləri bu gün 1,4 mindən çox reysi təxirə salıb. Belə ki, "Delta Air Lines" 600 reysi, "JetBlue Airways" 280 reysi, "Southwest Airlines" 130-dan çox reysi ləğv edib.
Aviaşirkətlər həmçinin həftənin 2-ci gününə 1013 reysin ləğv olunduğunu da elan edib. Şirkət nümayəndələri deyiblər ki, biz bu rəqəmin növbəti günlərdə əhəmiyyətli dərəcədə artacağını gözləyirik. Çünki ölkənin şimal-şərqində vəziyyət ürəkaçan deyil.
ABŞ-ın Milli Meteoroloji Xidməti xəbərdarlıq edib ki, yaxın vaxtlarda ölkənin şimal-şərq sahilində təqribən 90 santimetr qar düşə bilər. Beləliklə, qar tufanı Nyu-Yorkun tarixində ən güclü ola bilər. 2006-cı ilin fevralında qeydə alınmış 70 santimetrlik qar düşməsi rekord sayılırdı.
Mənbə
ANS PRESS