Voleybol üzrə qadınlardan ibarət milli komandamız Belçikanın Antverpen şəhərində Avropa Çempionatının qrup mərhələsi çərçivəsində üçüncü oyununu keçirib.
ANS PRESS-in məlumatına görə zəriflərimiz bu dəfə macarıstanlı həmkarları ilə qarşılaşıb. İlk setdə xanımlar 16:25 hesabı ilə məğlub olsalar da, ikinci seti 28:26 hesabı ilə aktivinə yazdırıblar. Ancaq yığmamızın qazancı cəmi bir set olub.
Üçüncü və dördüncü setdə 22:25 və 16:25 hesabı ilə məğlub olan yığmamız Avropa Çempionatı ilə vidalaşmalı olub.
Bu oyuna qədər voleybolçu xanımlarımız Türkiyə və Belçika milliləri ilə qarşılaşıblar. Türkiyə ilə oyunda millimiz 3 setdə də məğlub olub. ( 21:25, 26:28, 13:25).
İkinci oyunda isə voleybolçularımız belçikalı həmkarları ilə münasibətlərinə aydınlıq gətiriblər. Türkiyə ilə oyunda olduğu kimi zəriflərimiz bir setdə belə qalıb gələ bilməyərək 0:3 hesabı ilə məğlub olublar. ( 17:25, 20:25, 25:27).
Azərbaycan - Macarıstan oyunu
Ölkəmizdə keçirilən Birinci Avropa Oyunlarında voleybolçu xanımlarımız 1/2 final mərhələsinə kimi irəlləməyi bacarıb. Finala gedən yolda Türkiyə millisinə 2:3 hesabı ilə məğlub olan zəriflərimiz bürünc medal uğrunda Serbiya yığması ilə mübarizə aparıb. Serblərlə oyunda 2:3 hesabı ilə məğlub olan voleybolçularımız Avropa Oyunlarını medalsız başa vurublar.
