Bakı, 22 oktyabr, AZƏRTAC
Bu ilin yanvar-sentyabr aylarında Azərbaycanda toplanmış sığorta haqlarının 250,2 milyon manatı və ya 73,7 faizi qeyri-həyat sığortasının payına düşüb.
Azərbaycan Sığortaçılar Assosiasiyasından AZƏRTAC-a bildirilib ki, 2014-cü ilin eyni dövrünə nisbətən qeyri-həyat sığortası bazarı 5,4 faiz böyüyüb.
Belə ki, qeyri-həyat sığortası üzrə yığımların 23,3 faizi və ya 58,3 milyon manatı avtomobillərin icbari sığortasının, 20,3 faizi və ya 50,8 milyon manatı tibbi sığortanın, 9,6 faizi və ya 23,9 milyon manatı əmlakın yanğından və digər risklərdən sığortasının, 9,2 faizi və ya 23 milyon manatı kasko sığortasının, 8,8 faizi və ya 22 milyon manatı daşınmaz əmlakın icbari sığortasının, 28,8 faizi və ya 72,2 milyon manatı isə digər qeyri-həyat sığortası növlərinin payına düşüb.
Bu ilin 9 ay ərzində sığorta ödənişlərinin 73,2 faizini və ya 93,3 milyon manatını qeyri-həyat sığortası təşkil edib. Bu da 2014-cü ilin eyni dövrü ilə müqayisədə 0,5 faiz çoxdur.
Qeyri-həyat sığortası üzrə ödənişlərin 39,8 faizi və ya 37,1 milyon manatı tibbi sığortaya, 26,2 faizi və ya 24,5 milyon manatı avtomobillərin icbari sığortasına, 19,8 faizi və ya 18,4 milyon manatı kasko sığortasına, qalan 14,2 faizi və ya 13,3 milyon manatı isə digər qeyri-həyat sığortası növlərinə aiddir.
Hesabat dövründə qeyri-həyat sığortası bazarında toplanmış hər 100 manat sığorta haqqının 37,3 manatı ödəniş edilib. 2014-cü ilin ilk 9 ayında bu rəqəm 39,1 manat olub.
