Bakıda adam öldürən şəxsin şikayəti rədd edildi

Bakıda adam öldürən şəxsin şikayəti rədd edildi
11:54 29 Dekabr 2014
92 Ölkə
Ölkə mətbuatı
A- A+

Bakı Apelyasiya Məhkəməsində qəsdən adam öldürməkdə təqsirli bilinən Emin Səfərov və Münasib Xəlilovun apelyasiya şikayəti üzrə məhkəmə prosesi başa çatıb. Lent.az-ın məlumatına görə 2013-cü il, hakim Əflatun Qasımovun sədrliyi ilə keçirilən prosesdə qərar elan edilib. Qərara görə, təqsirləndirilən şəxslərin apelyasiya şikayətləri təmin edilməyib və birinci məhkəmə instansiyasının hökmü qüvvədə saxlanılıb.

 

Qeyd edək ki, yanvarın 29-da Nərimanov rayonu, Faiq Yusifov küçəsində qanlı cinayət hadisəsi baş verib. Həmin küçədə yerləşən “Günəş” saunasının yaxınlığında düşən kütləvi davada iki qardaş - 38 yaşlı Vüqar Orucov və 35 yaşlı Bəxtiyar Orucov bıçaqlanıblar. Vüqar Orucov aldığı xəsarətdən hadisə yerindəcə dünyasını dəyişib, qardaşı isə ağır vəziyyətdə xəstəxanaya yerləşdirilib. Dəmir satışı ilə məşğul olan Bəxtiyar və Vüqar Orucov qardaşları satdıqları malın pulunu götürməyə gəliblər.

“Günəş” saunasının qarşısında dayanıb söhbət edəndə qətli törədən onlara eyvanın altında dayanmalarını irad tutub. O, sonradan aşağı düşüb və mübahisə böyüyüb. Həmin şəxs az sonra gedib, bir neçə nəfərlə yenidən qayıdıb və bıçaqla qardaşlara zərbələr endirib. Nərimanov rayon Polis İdarəsi və rayon prokurorluğunun keçirdikləri əməliyyat axtarış tədbirləri nəticəsində qətlin iştirakçıları Emin Səfərov və Münasib Xəlilov tutulublar. Emin Səfərov Cinayət Məcəlləsinin 221.2-ci (xuliqanlıq), Münasib Xəlilov isə 120.1-ci (qəsdən adam öldürmə) maddələri ilə ittiham ediliblər.
Bakı Ağır Cinayətlər Məhkəməsinin hökmü ilə Münasib Xəlilov 15 ilvə Emin Səfərov 8 il müddətinə azadlıqdan məhrum ediliblər. Hökmdən narazı qalan təqsirləndirilən şəxslər apelyasiya şikayəti veriblər. Onlar barələrində təyin edilmiş hökmün dəyişdirilməsini, daha yüngül cəzanın təyin edilməsini xahiş ediblər.
 

RƏYLƏR

BU KATEQORİYADAN DİGƏR XƏBƏRLƏR