Bu gündən etibarən dövlət qulluqçularının attestasiyası müəyyən olunmuş müddət ərzində aparılacaq və nəticələrə əsasən onların işdə qalıb - qalmayacaqları ilə bağlı qərarlar qəbul ediləcək. Bu, Nazirlər Kabinetinin təsdiq etdiyi "Dövlət qulluqçusunun attestasiyasının keçirilməsi qaydaları"nda əksini tapıb.
Milli.Az "Xəzər Xəbər"ə istinadən bildirir ki, artıq hər bir dövlət qulluqçusu öz üzərinlə işləməyə məcbur olacaq. Çünki Nazirlər Kabinetinin təsdiq etdiyi "Dövlət qulluqçusunun attestasiyasının keçirilməsi Qaydaları"nın məqsədi bu kateqoriyaya aid olanların, tutduqları vəzifəyə uyğun gəlib-gəlmədiyinin müəyyənləşdirilməsi və onların peşə səriştəliyinin artırılmasının stimullaşdırılmasıdır.
Dövlət Qulluğu Məsələləri üzrə Komissiyasının hüquq şöbəsinin müdiri Vüqar Əsgərovun sözlərinə görə, inzibati və yardımçı vəzifələri tutan hər bir dövlət qulluqçusu 5 ildən bir imtahandan keçəcək.
Attestasiya komissiyası tərəfindən həyata keçiriləcək proses nəticəsində dövlət qulluqçularına " Tutduğu vəzifəyə uyğun gəlir" , "İşini yaxşılaşdırsa və komissiyanın tövsiyələrini yerinə yetirsə, 1 ildən sonra təkrar attestasiyadan keçmək şərtilə tutduğu vəzifəyə uyğun gəlir " və "Tutduğu vəzifəyə uyğun gəlmir." qiymətləri veriləcək. Yəni dövlət qulluqçusu işdən kənarlaşdırıla da bilər.
Eyni zamanda yaxşı nəticə göstərən dövlət qulluqçularının analoji olaraq daha yüksək vəzifəyə təyin edilməsi də istisna edilmir.
Milli.Az