Bakı, 14 dekabr, AZƏRTAC
Dekabrın 14-də Azərbaycan tələbə könüllülərinin birinci forumu keçirilib. Forum könüllük hərəkatının inkişafı, bu sahədə cəmiyyətin maarifləndirilməsi və tələbələrin ictimai həyatda fəal iştirakının stimullaşdırılması məqsədilə təşkil olunub.
AZƏRTAC xəbər verir ki, Təhsil Nazirliyinin dəstəyi ilə keçirilən forumda Azərbaycan Prezidenti Administrasiyasının humanitar siyasət məsələləri şöbəsinin müdiri Fatma Abdullazadə, təhsil naziri Mikayıl Cabbarov, gənclər və idman naziri Azad Rəhimov, Milli Məclisin deputatları, ali məktəblərin rektorları, eləcə də 16 universitetdən 400-dək tələbə iştirak edib.
Forumda çıxış edən təhsil naziri Mikayıl Cabbarov bildirib ki, tələbə könüllülərin yüksək səviyyəli fəaliyyəti onların gələcək karyera imkanları qazanmasında, vətəndaş məsuliyyətinin formalaşmasında müsbət rol oynayacaq. Qeyd olunub ki, gələn ilin iyun ayında Bakıda keçiriləcək “Formula-1” üzrə Avropa Qran-pri yarışlarının təşkilində də tələbələr xüsusi fəallıq göstərəcəklər. M.Cabbarov, həmçinin “Bakı-2015” ilk Avropa Oyunları zamanı Təhsil Nazirliyinin tabeliyində olan qurumlardan 10 mindən çox könüllünün cəlb olunduğunu xatırladıb.
Gənclər və idman naziri Azad Rəhimov qeyd edib ki, bu gün gənclər siyasəti Azərbaycanda prioritet istiqamətlərdən biridir. Gənclərimiz Vətəni qoruyur, eyni zamanda, ölkəmizi beynəlxalq idman və elm yarışlarında təmsil edirlər. Artıq ölkəmizdə könüllülük hərəkatı geniş vüsət alıb. Yüzlərlə gənc bu sıralara qoşulmağa can atır.
Bu gün Azərbaycan gənclərinin azad, demokratik və müstəqil bir dövlətdə yaşadıqlarını vurğulayan Prezident Administrasiyasının humanitar siyasət məsələləri şöbəsinin müdiri Fatma Abdullazadə tələbələrə müraciətlə deyib: “Hər bir Azərbaycan ailəsində milli dəyərlərə, İslam ənənələrinə möhkəm bağlılıq var. Siz xoşbəxtsiniz ki, müstəqil, demokratik ölkənin vətəndaşlarısınız. Eyni zamanda, bizim qarşımızda həllini gözləyən mühüm bir problem də var. Bu, işğal altındakı torpaqlarımızın düşmən tapdağından azad olunmasıdır. Elə bir azərbaycanlı olmaz ki, Qarabağ onun qəlbində yaşamasın. İnanıram ki, bu problem siz gənclərin yaxından iştirakı ilə həllini tapacaq. Vaxt gələcək, belə toplantılar Şuşada təşkil olunacaq”.
Birləşmiş Millətlər Təşkilatının (BMT) İnkişaf Proqramının rezident nümayəndəsinin müavini Natalia Alhazişvili BMT-nin Azərbaycanda könüllülük hərəkatına fəal dəstək verdiyini diqqətə çatdırıb. Onun sözlərinə görə, təmsil etdiyi təşkilat hər bir ölkədə olan yaxşı nümunələri digər dövlətlərdə geniş təbliğ edir. Bu mənada Azərbaycanda yalnız gənclərə deyil, ümumilikdə könüllülük hərəkatına göstərilən dəstək başqalarına da nümunə ola bilər.
Daha sonra forumda “BİR” Tələbə-Könüllü Proqramının təqdimatı olub. Məlumat verilib ki, proqram pilot layihə olaraq Bakı, Sumqayıt və Gəncə şəhərlərində yerləşən on ali təhsil müəssisəsini əhatə edir. Proqram çərçivəsində tələbələr könüllülük fəaliyyətinə cəlb olunacaq, onlara “Əsl tələbə həyatı” modelinə uyğun altı müxtəlif istiqaməti özündə birləşdirən layihə təqdim ediləcək.
Forumda tələbələr arasında könüllülük fəaliyyətindən bəhs edən “Azərbaycan könüllüləri: “Dünən, bu gün və sabah” videoçarxı təqdim olunub.
Tədbir tələbələrin ifasında səslənən “Tələbə” mahnısının sədaları altında yekunlaşıb.
