Bakı. Trend:
Azərbaycan Respublikasının Prezidenti yanında Bilik Fondunun sektor müdiri, fəlsəfə doktoru Xatirə Hüseynova
Hamısı səliqəli, bəmbəyaz köynəkdə, saçlarında ağ lent... Kimi ora-bura qaçır, kimi axşamdan bəri bəlkə yüz dəfə oxuduğu məruzəsinə təkrar göz gəzdirir, kimi dəhlizdə sərgilənmiş rəsmlərin qarşısında xatirə şəkilləri çəkdirir... Və bir qədər sonra Azərbaycan Respublikasının Prezidenti yanında Bilik Fondunun Ümummilli lider Heydər Əliyevin xatirəsinə həsr olunmuş “Kitabi-Dədə Qorqud” və Haynrix Fridrix fon Dits - 200” mövzusunda Beynəlxalq Şagird Konfransı işinə başlayır.
Dəfələrlə yerli və beynəlxalq konfransların iştirakçısı olmuşam, tələbə konfranslarına qatıldığım da olub. Amma ilk dəfədir ki, Beynəlxalq Şagird Konfransındayam. Uşaqları sinif otaqlarından konfrans zalına, məktəb partasından “dəyirmi masa”ya, lövhə qarşısından kürsüyə qaldıran bu konfransın yeniyetmələrin həyatında xüsusi iz qoyacağını anlamaq çətin deyil.
Xəyalən uzun illər əvvələ - məktəbli vaxtlarıma qayıdıram. Onlar kimi həyəcanlanıram, onlar kimi təlaşla bir-birini əvəz edən çıxışları dinləyirəm. Arabir ikinci sırada əyləşən Türkiyədən gələn məktəbli Zeynəbin anasına qısılıb pıçıltıyla “çox həyəcanlıyam” deməsini eşidirəm.
Zalda Azərbaycanın bütün bölgələrindən – Bakı, Gəncə, Naxçıvan, Quba, İsmayıllı, Zaqatala, Şirvan, Naftalan, Xaçmaz, Beyləqan, Qəbələ, Yevlax, Tərtər, Bərdə, Lənkəran və Ağdaşdan gələn məktəblilər var. Bilik Fondunun millətlərarası, multikulturalizm və dini məsələlər üzrə Dövlət müşaviri, akademik Kamal Abdullayevin təşəbbüsü ilə keçirdiyi ilk Beynəlxalq Şagird Konfransında xarici ölkələrdən – Türkiyə, Rusiya, Ukrayna, Gürcüstan və İsraildən də şagirdlər təmsil olunub.
İki gün davam edən Beynəlxalq Konfrans yekunlaşır, hər addımlarından qatıldıqları tədbirin ciddiliyini tam anlayan və həvəslə müzakirələrə qoşulan uşaqlarla söhbətləşirəm.
Naxçıvan şəhər 8 nömrəli məktəbin şagirdi ən kiçik iştirakçı Suay Qasımlı 4-cü sinifdə oxumasına baxmayaraq, zalda əyləşənlərin hamısının diqqətini cəlb edə bilmişdi. “Mən qədim Naxçıvan torpağından gəlmişəm, balaca olmağıma baxmayın, “Kitabi-Dədə Qorqud” dastanının boylarını anamdan və atamdan dinləyərək böyümüşəm. Evdəki kitabxanamda ən əziz kitablarımın içərisindədir. Qayıdanda məktəb yoldaşlarıma burda tanış olduğum yeni dostlarımdan, konfrans təəssüratlarımdan, xarici qonaqlarla birgə şəhər gəzintisindən danışacağam. Bu mənim belə yüksək səviyyəli tədbirdə ilk iştirakım idi, istərdim ki, Naxçıvanda da belə konfrans keçirilsin”.
Türkiyənin Elvankent Bilgi Anadolu liseyinin şagirdi Hüsnü Barak Sarıkaya qardaş ölkədə beynəlxalq səviyyəli konfransda iştirakdan məmnun olduğunu dedi. “Əvvəlcə onu deyim ki, Bakının gözəlliyinə heyran qaldım. Şəhər gəzintisindən böyük zövq aldım. Konfransda iştirakımı uğurum kimi dəyərləndirirəm. “Kitabi-Dədə Qorqud” dastanı təkcə türklərin deyil, dünya folklorşünaslığının nadir incisidir. Məncə, bizim Ana kitabımız bütün dünya ədəbiyyatına böyük töhfədir”.
Rusiyanın Moskva Şəhər Gimnaziyasinin şagirdi Mariya Voroşilova əmindir ki, Bakıda özünə çoxlu yeni dostlar tapacaq. “Mən bu konfransa hazırlaşanda “Kitabi-Dədə Qorqud” dastanı ilə Rus folklorunda olan dastanları müqayisə etməyə çalışdım. Oxşarlıq çoxdur. Hər iki xalqın folklorunda qəhrəmanlıq, anaya, qadına məhəbbət, böyüklərə hörmət təbliğ olunur. Bu dastanlar biz məktəbliləri vətənsevərlik ruhuna kökləyir”.
Nardaran məktəblisi Həsən Ağayev konfrans iştirakçılarını oxuduğu məktəbə dəvət etdiyini dedi. “Bu tədbirdə iştirak etməyimdən qürur duyuram. Çox sevinirəm. Sevinirəm ki, müxtəlif ölkələrdən, Azərbaycanın müxtəlif bölgələrindən gəlmiş şagirdlərlə tanış olmuşam. Onlar arasında özümə yeni dostlar qazanmışam. Oxuduğum Nardaran məktəbində də dostlarım təəssüratlarımı bölüşmək üçün məni səbirsizliklə gözləyirlər. Düşünürəm ki, onlara demək üçün xeyli sözüm olacaq. Əcnəbi dostlarımızı və digər şagirdləri də məktəbimizə qonaq dəvət etmişəm. Çox istərdim ki, belə tədbirlərdən biri də bizim məktəbdə keçirilsin”.
Dərbənd məktəbliləri Abakar Atayev və Sarya Abuzarova Beynəlxalq Şagird Konfransına qatılmaqdan çox məmnun olduqlarını deyirlər. “Bizi istiqanlı və mehriban qarşılayan Azərbaycan məktəbliləri ilə bundan sonra da dostluğumuzu davam etdirəcəyik. Bu gün bizi “Kitabi-Dədə Qorqud” birləşdirdi, belə Şagird Konfranslarının tez-tez keçirilməsini istərdik. Elmi çərçivədə biz məktəblilərin də səsinin dinlənilməsi, bizim də maraqlı müzakirələrə cəlb olunmağımız qürurvericidir”.
Bakını çox bəyəndiyini deyən Gürcüstanın Kutaisi şəhər məktəbinin şagirdi Elizabet Porçxidze “Kitabi-Dədə Qorqud”un bütün Qafqaz xalqlarının həyatında yeri olduğunu söylədi. “Dastanı sevə-sevə oxudum. Boylardan bəzilərində gürcü xalqının da adı keçir. Burdakı yer adları, toponimlər sübut edir ki, Qafqazda əsrlər boyu azərbaycanlılarla gürcülər yanaşı, mehriban qonşuluq şəraitində yaşayıblar. Bu qədim dastan da indiki nəslə xalqlarımızın dostluğunun nə qədər dərin tarixi köklərə dayandığını sübut edir”.
İki gün davam edən konfrans Bilik Fondunda çay süfrəsi ilə yekunlaşdı. Qonaqlar Fondun fəaliyyətinə həsr olunmuş filmi izlədilər, dostlaşan məktəblilər bir-birinin əlaqə nömrələrini, elektron ünvanlarını aldılar. Bu gün Bilik Fondu dinindən, dilindən asılı olmayaraq bütün konfrans iştirakçılarını Dədə Qorqud işığında birləşdirdi. Yanan çırağımız sönməsin!
Bizi Twitter-dən izləyin: @trend_az
