Bakıda binanın 9-cu mərtəbəsindən yıxılan 17 yaşlı qız sağ qalıb.
Baş Prokurorluğun mətbuat xidmətindən ANS PRESS-ə verilən məlumata görə,1998-ci il təvəllüdlü, 1 saylı Bakı Tibb Kollecinin tələbəsi Esmira Əhmədova Səhiyyə Nazirliyinin paytaxtın Yasamal rayonunda yerləşən İctimai Səhiyyə və İslahatlar Mərkəzinin inzibati binasının 9-cu mərtəbəsindən yük liftinin şaxtasına yıxılıb. O, 1-ci mərtəbədə dayanan vəziyyətdə olan liftin üzərinə düşüb. E.Əhmədova aldığı xəsarətlərlə xəstəxanaya yerləşdirilib.
Faktla bağlı Yasamal rayon prokurorluğunda Cinayət Məcəlləsinin 314.1-ci (səhlənkarlıq) maddəsi ilə cinayət işi başlanıb.
Hazırda iş üzrə istintaq tədbirləri davam etdirilir.
Sentyabr ayının 9-da da Sumqayıt şəhərində 54 yaşlı kişi liftin şaxtasına düşüb. Bu barədə Fövqəladə Hallar Nazirliyinin “112” qaynar telefon xəttinə məlumat daxil olub.
Həmin məlumata əsasən, Sumqayıt şəhərində 1961-ci il təvəllüdlü Surxayev Yaşar Fərhad oğlu liftin şaxtasında düşərək köməksiz vəziyyətdə qalıb. Hadisə yerinə dərhal Fövqəladə Hallar Nazirliyinin müvafiq xilasetmə qüvvələri cəlb olunub. Xilasedicilər liftin şaxtasına baxış keçirərkən Y.Surxayevin cəsədini aşkarlayıblar.
