İstehlak kreditləşməsində fəal olan banklar "Bank of Baku" ASC, "Unibank" ASC, "Bank Respublika" ASC kreditləşmənin müvəqqəti olaraq dayandıranlar siyahısındadır. Banklardan bildirilib ki, kredit məhsullarının satışı cari vəziyyətlə əlaqədar olaraq müvafiq təhlil işlərinin aparılması məqsədilə müvəqqəti olaraq dayandırıb. Təhlil prosesinin bir neçə gün davam edəcəyi gözlənilir. "Unibank"dan prosesin gün ərzində bərpasının da mümkünlüyünü istisna etməyiblər. "Expressbank" ASC-dən isə kreditlərin taleyi ilə bağlı bu gün keçirilən iclasdan sonra qərarın açıqlanacağını bildirilib.
Bununla yanaşı, "Dəmirbank" ASC, "Bank VTB (Azerbaijan)" ASC, "Kapital Bank" ASC, "Azər-Türk Bank" ASC kreditləşməni davam etdirir. Bildirək ki, "Kapital Bank" kreditləri yalnız manatla, "Azər-Türk Bank" dollarla, digərləri isə həm manat, həm də dollarla ayırır. Buna baxmayaraq, kreditləşməni davam etdirən banklarda proses məhdudlaşdırılıb.
Qeyd edək ki, uzunmüddətli xarakter daşıyan xarici iqtisadi şokların güclənməsini nəzərə alaraq, tədiyyə balansının tarazlaşdırılması, ölkənin valyuta ehtiyatlarının kritik səviyyədə qorunması, milli iqtisadiyyatın beynəlxalq rəqabət qabiliyyətinin təmin olunması məqsədilə Azərbaycan Mərkəzi Bankının İdarə Heyəti dekabrın 21-dən "üzən məzənnə" rejiminə keçilməsi barədə qərar qəbul edib. Nəticədə, AMB dünən ABŞ dollarının rəsmi məzənnəsini 50 qəpik yaxud 47,63% artıraraq 1,55 AZN/USD səviyyəsində müəyyənləşdirib.
