Bu gün təmas xəttində erməni silahlı birləşmələrinə məxsus pilotsuz uçan aparatın çəkdiyi görüntülər yayaılıb. Müdafiə Nazirliyinin mətbuat xidmətindən ANS PRESS-ə verilən məlumata görə, ermənilər guya onlara məxsus PUA-nın vurulmadığı barədə iddialar yayılıb.
Erməni tərəfinin iddialarına cavab olaraq mövqelərimizə yaxınlaşan və çəkilişlər etməyə cəhd göstərən düşmən aparatının vurulma anı və kamerasından əldə edilmiş kadrları təqdim edirik.
Ermənistan Silahlı Qüvvələrinin pilotsuz uçan aparatı (PUA) bu gün məhv edilib.
Azərbaycan Müdafiə Nazirliyinin mətbuat xidmətindən ANS PRESS-ə verilən məlumata görə, dekabrın 25-də saat 11.45 radələrində Tərtər rayonu istiqamətində Ermənistan silahlı qüvvələrinə məxsus pilotsuz uçan aparat aşkarlanıb. Aparat bölmələrimiz tərəfindən sərrast atəşlə dərhal məhv edilib.
Erməni PUA-sının çəkdikləri
Bu son bir ayda Azərbaycan tərəfindən vurulan ilk erməni PUA-sı deyil. Ay ərzində ermənilərin ən azı bir neçə belə aparatı məhv edilib. Məsələn, dekabrın 9-da saat 9.00 radələrində erməni PUA-sı Tərtər rayonu istiqamətində vurulub. Qurğu Silahlı Qüvvələrimizin mövqeləri üzərində uçuşlar həyata keçirməyə cəhd göstərib.
Ermənistan Silahlı Qüvvələrinə məxsus DJI Inspire 1 (Quadcopter) tipli pilotsuz uçan aparat (PUA) bölmələrimizin sayıqlığı nəticəsində vaxtında aşkar olunaraq açılan atəş nəticəsində məhv edilib.
Dekabrın 6-da erməni PUA-sı vurulub. Ermənistan silahlı qüvvələrinə məxsus kiçik ölçülü pilotsuz uçan aparat aşkarlanaraq Hərbi Hava Qüvvələri hava hücumundan müdafiə qoşunlarının bölmələri tərəfindən sərrast atəşlə dərhal məhv edilib.
