Yola saldığımız 2015-ci il ölümlə nəticələnən bir sıra ağır yol qəzaları və bəzi dəhşətli cinayət hadisələri ilə də yadda qaldı.
ANS PRESS oxucularına il ərzində insan itkisi ilə müşayiət olunan yol qəzalarının və cinayət faktlarını təqdim edir.
İl ərzində ən çox ölüm faktı qeydə alınan hadisələrdən biri iyul ayının 31-də Samuxda qeydə alınıb. Məmmədov Zöhrab Faiq oğlunun idarə etdiyi “VAZ 2106” markalı avtomobilin idarəetməni itirərək Gəncə çayına aşması nəticəsində 5 nəfər dünyasını dəyişib, 6 nəfər isə yaralanıb. Qəza zamanı ölənlərdən 2-si körpə olub.
Bundan sonra avqustun 1-də Bakı- Sumqayıt yolunda dəhşətli qəza baş verdi.
Bakı şəhər sakini 1994-cü il təvəllüdlü Əliyev Əli Xanlar oğlu idarə etdiyi "Opel Astra" markalı, 90- XJ- 976 dövlət nömrə nişanlı avtomobillə Quba istiqamətinə hərəkət edərkən texniki nasazlıq səbəbindən yolun kənarında dayanan "Mercedes" markalı, 90-TE-701 dövlət nömrə nişanlı yük avtomobilinin qoşqu hissəsinə çırpıldı.
Qəza zamanı minik maşınında 6 nəfər olub. Onlardan 5-i hadisə yerində, 1-i isə xəstəxanada dünyasını dəyişib. Ölənlərdən 1994-cü il təvəllüdlü Əli Xanlar oğlu Əliyev, 1996-cı il təvəllüdlü Məhəmməd Xanlar oğlu Əliyev qardaş, 1970- ci il təvəllüdlü Xanlar Əziz oğlu Əliyev onların atası, 2004 - cü il təvəllüdlü Rəvan Sabir oğlu Əliyev isə ölən uşaqların əmisi oğlu olub.
Şəki İstintaq Təcridxanasının əməkdaşlarının qəzaya düşdüyü avtomobil
Avqust ayının 27-də isə Qax- Şəki yolunda baş verən qəzada 4 nəfər ölüb. Şəki istiqamətinə hərəkət edən sürücü qəfil idarəetməni itirib və avtomobil yol kənarındakı dərəyə aşaraq 50 metrə qədər yuvarlanıb. Nəticədə avtomobildə olan sürücü və 3 sərnişin yerindəcə keçiniblər. İlkin məlumatlara görə avtomobil qəzasında ölənlər Şəki İstintaq Təcridxanasının əməkdaşları olub.
Sentyabr ayının 1-də Bakı-Sumqayıt yolunda baş verən dəhşətli qəza da hələ uzun müddət yaddaşlardan silinməyəcək. Ceyranbatan su anbarının yaxınlığında “Ford-Tranzit” markalı mikroavtobusun sürücüsü idarəetməni itirir və avtomobil yol kənarındakı maneəyə çırpılıb. Hadisə nəticəsində 3 nəfər ölüb, 10 nəfər xəsarət alıb. Qəza zamanı yolun kənarında quraşdırılan dəmir arakəsmə avtomobilin qabaq hissəsindən salona girdiyi üçün 2 nəfərin ayağı qopmuşdu. Araşdırma nəticəsində məlum olub ki, sürücü avtomobili idarə edərkən yuxulu olub.
Dekabrın 6-da Biləsuvarda da dəhşətli qəza baş verdi. Nəticədə bir ailə yer üzündən silindi.
Astara şəhər Səməd Vurğun küçəsində yaşayan Əlvan Cəfər oğlu Şəfiyevin idarə etdiyi "MAN" markalı qoşulu yük avtomobili ilə Biləsuvar rayonunun Təzəkənd kənd sakini, 1986-cı il təvəllüdlü Mənsur Firudin oğlu Bayramovun idarə etdiyi "Vaz-21015" markalı avtomobil toqquşub.
Qəza nəticəsində "Vaz-21015" markalı avtomobildə olan Tərlan Bayramov, onun həyat yoldaşı 1986-cı il təvəllüdlü Günay Bayramova, övladları 2010-cu il təvəllüdlü Nərmin Bayramova və ailənin ən kiçiyi- 2011-ci il təvəllüdlü Səkinə Bayramova hadisə yerində dünyasını dəyişib.
Ailənin qəzaya düşüb məhv olduğu maşın
Bu il bir sıra tükürpədici cinayət hadisələri və bədbəxt hadisələrlə də yadda qaldı.
Mart ayının 26-da Gəncə şəhərində yaşayan Ruslan Behbudzadə qısqanclıq zəminində arvadı, Samux rayon sakini Gülnarə Mirzəyevanı boğaraq qətlə yetirib və daha sonra cəsədini Daşkəsən rayonunun Xoşbulaq kəndinin meşə zolağında basdırıb.
İyun ayının 20-də Gəncədə dəhşətli qətl hadisəsi baş verib. Şəhərin “beş yol” adlanan ərazisində yaşayış evində biri 1, digəri 3 yaşlı olmaqla iki uşağın başı kəsilmiş halda meyiti aşkar edilib.
Avqust ayının 13-də isə Ağdam rayonunda dəhşətli hadisə qeydə alınıb.
İlxıçı kənd sakini Xanəli Abbasovun iki övladı sandıqda havasızlıqdan boğularaq yerindəcə keçinib.
2007-ci il təvəllüdlü Bahar Xanəli qızı Abbasova və onun qardaşı 2009-cu il təvəllüdlü Nicat Xanəli oğlu Abbasov evdə oynayarkən içi paltarla dolu olan sandığı boşaldaraq içinə girib və qapağını örtüblər. Elə bu vaxt sandığın qapağı kilidlənib. Qapağı ilişərək kilidlənən sandıqdan çıxa bilməyən hər iki uşaq yerindəcə dünyasını dəyişib.
Abbasovlar ailəsinin Bahar və Nicatdan başqa övladı olmayıb.
Oktyabr ayının 1-də Bakıda qadın sevgilisi ilə birləşərək ərini doğrayaraq meşədə basdırıb.
1975-ci il təvəllüdlü Lalə Yaşar qızı Mahmudova sevgilisi Sədi Bəhram oğlu Məmmədovla əlbir olaraq həyat yoldaşı 1970-ci il təvəllüdlü Kamran Mahmudovu əvvəlcə öldürüm sonra isə onun meyitini hissələrə ayıraraq İsmayıllı rayonunun Talışıstan kəndi yaxınlığına apararaq həmin ərazidəki meşədə basdırıblar.
Hadisənin baş verməsinə səbəb kimi Kamran Mahmudovun həyat yoldaşından boşanmaq istəməməsi göstərilir.
Ruhi xəstənin valideynlərini öldürdüyü kəndin xəritəsi
İlin ən səs-küylü cinayət işlərindən biri oktyabr ayının 4-də Tərtərdə baş verib.
Ruhi xəstə olan kənd sakini Qurban Nəsibov atası 64 yaşlı Xanbaba Nəsibovu və anası Nazlı Nəsibovanı qətlə yetirib. O, anasını boğan gənc, atasının baş nahiyəsinə dəmir parçasıyla zərbə endirib.
Hadisəni törətdikdən sonra səhər saatlarında qonşu kəndə, bacısının evinə gedən Qurban yaxınlarına ata anasının yuxudan oyanmadığını deyib.
İl ərzində ən çox danışılan hadisələrdən biri də, oktyabr ayının 21-də Bakının Nəsimi rayonu Ağadadaş Qurbanov küçəsində baş verib. 20 yaşlı Fəqan Fərzəliyevlə bir məhəllədə yaşayan və kimliyi məlum olmayan 18 yaşlı qızı elektrik cərəyanı vurub. Onlar yüksək gərginlikli transformatorun yerləşdiyi tikilinin qapısını açaraq içəri daxil olublar.
Bu zaman ehtiyatsızlıq səbəbindən 6 min volt gərginlikli elektrik naqilinə toxunan Fəqan Fərzəliyevi və yanındakı qonşu qızı elektrik cərəyanı bir neçə metr kənara atıb.
Elektrik cərəyanı vuran oğlan
Hər iki şəxs ağır xəsarətlərlə 1 saylı şəhər xəstəxanasına çatdırılıblar. Hadisə nəticəsində adı hələlik məlum olmayan qız ayağından və alın nəyihəsindən yanıq xəsarətləri alıb. Çoxsaylı yanıq xəsarətləri alan Fəqan Fərzəliyevin isə qolunun biri amputasiya olunub.
İlin ən dəhşətli hadisələrindən biri bu ilin noyabr ayının 6-da Yevlaxda
baş verib. Samux rayon sakini, Aşağı Bucaq kəndində bacısının evində yaşayan 1981-ci il təvəllüdlü Musa Nəzər oğlu Nəsirov 1952-ci il təvəllüdlü anası Ofeliya Abdullayevanı qətlə yetirib. Daha sonra o, anasını həyətyanı sahələrində basdırıb.
Hadisədən sonra hüquq-mühafizə orqanlarına qadının itkin düşməsi barədə şikayət daxil olub. Polisin apardığı araşdırmalar nəticəsində Ofeliya Abdullayevanın oğlu tərəfindən öldürüldüyü müəyyən edilib. Öldürülən qadının cəsədi 2 ay tualet quyusunda qalıb. Hadisədən sonra Musa Nəsirov anasını öldürməsinə səbəb kimi, onun 5-ci dəfə ərə getmək istədiyini bildirib.
