Bakı, 4 yanvar, AZƏRTAC
Fövqəladə Hallar Nazirliyinin nümayəndələri və istintaq qrupunun üzvləri Türkmənistan sahillərində aşkarlanan meyitlərə baxış keçiriblər. 10-cu dərin dəniz özülündə baş vermiş qəza nəticəsində itkin düşən neftçilərin Əzizağa Quliyev Nöhbala oğlu və Adil Abdullayev Ələkbər oğlu olduğu müəyyən edilib.
Nazirliyin mətbuat xidmətindən AZƏRTAC-a bildiriblər ki, onların nəşləri yaxın vaxtda ölkəmizə gətiriləcək.
Qeyd edək ki, Azərbaycan Respublikası Fövqəladə Hallar Nazirliyinin Xəzəryanı ölkələrin müvafiq qurumlarına müraciətindən sonra aparılan axtarış-xilasetmə işləri zamanı Xəzər dənizinin Türkmənistan sahillərindən 65-70 km uzaqlıqda 2 kişi cəsədi aşkar edilmiş və Kiyanlı dəniz limanına aparılmışdı. Məlumat daxil olduqdan sonra FHN-in “BE-200ÇS” amfibiya tipli təyyarəsi istintaq qrupu ilə birgə cəsədlərin tanınması və respublikaya gətirilməsi üçün yanvarın 4-də səhər Türkmənistana yola düşmüşdü.
