Dövlət Gömrük Komitəsi idxal əməliyyatları zamanı vəsaitin dövlət büdcəsinə tam ödənməsindən yayınmağa çalışan bəzi işbazlara xəbərdarlıq edib.
Komitədən ANS PRESS-ə verilən məlumatda qeyd olunur ki, son illərdə baş verən qlobal iqtisadi böhran dünyanın əksər ölkələrinin iqtisadiyyatına mənfi təsir göstərib. Neftin qiymətinin son bir ildə aşağı düşməsinə paralel olaraq əksər ölkələrin milli valyutaları kimi Azərbaycan manatı da devalvasiyaya məruz qalıb.
Neftdən asılılığın aradan qaldırılaraq ölkə iqtisadiyyatının qorunması mqəsədilə yerli istehsalın stimullaşdırılması və inkişaf etdirilməsi, idxal-ixrac əməliyyatlarının təşviq etdirilməsi istiqamətində bir sıra addimlar atılır. Ancaq bu tədbirlərin reallaşdırılması zamanı sahibkarların, yerli istehsalçıların hüquqları ilə yanaşı, ilk növbədə, dövlətin mənafeləri də qorunmalıdır.
Bu işbazlar, əsasən, armatur və meyvə məhsullarının idxalı ilə məşğul olan şəxslərdir.
Bəzi işbazlar manatın devalvasiyaya uğraması ilə ölkədə yaranan iqtisadi mühitdən istifadə edərək, xüsusilə idxal əməliyyatları zamanı dövlət büdcəsinə çatacaq vəsaitin tam ödənməsindən yayınmağa çalışır.
Dövlət Gömrük Komitəsi Maliyə Tarif və Valyuta Nəzarəti Baş İdarəsinin rəisi, gömrük xidməti general-mayoru Mirqasım Vahabov bildirib ki, xarici iqtisadi fəaliyyət iştirakçıları ölkə ərazisinə idxal etdikləri malları bəyan edərkən qiymətlərə və malın dəyərləndirilməsinə çox diqqət etməlidir.
“Mala istənilən sənəd təqdim etməklə istədiyi qiyməti tətbiq etmək niyyətində olmaq heç də malın düzgün qiymətləndirilməsinə gətirib çıxara bilməz. Əfsuslar olsun ki, bu gün bir sıra işbazlar bundan sui-istifadə edərək "orijinal invoys" adı altında mallarını bəyan etmək xəyalına düşürlər. Onlar düşünməlidirlər ki, Azərbaycan qanunları var, malın gömrük dəyərləndirilməsi gömrük tarifi haqqında qanuna görə həyata keçirilir.
Mirqasım Vahabov - Dövlət Gömrük Komitəsinin rəsmisi
Təqdim olunan sənədlərdə yanlışlıqlar baş verərsə, bugünkü bazarı, yerli istehsalçıların və istehlakçıların maraqlarının qorunması məqsədilə gömrük xidməti malın bəyan edilməsinə nəzarət edir, əgər mal düzgün bəyan olunmayıbsa, QATT-ın VII maddəsində təsbit olunan prinsiplərə və "Gömrük tarifi haqqında" Azərbaycan Respublikasının Qanununa uyğun olaraq malın dəyərləndirməsi aparılır və dövlət büdcəsinə gömrük ödənişləri həyata keçirilir", deyə Mirqasım Vahabov bildirib.
İdarə rəisi bildirib ki, hazırda bu işbazlar, əsasən, armatur və meyvə məhsullarının idxalı ilə məşğul olan şəxslərdir.
M.Vahabov əlavə edib ki, hazırda bütün məhsulların minimum qiymətləri müəyyən edilərək ərazi və ixtisaslaşdırılmış gömrük idarələrinin bazasında yerləşdirilib, istənilən vaxt sahibkarlar mürəciət edib qiymətlərlə tanış ola bilərlər.
