BDU rektoru: Doktorantlara biri xaricdən olmaqla ikili elmi rəhbər təyin olunması təcrübəsi genişləndirilməlidir

BDU rektoru: Doktorantlara biri xaricdən olmaqla ikili elmi rəhbər təyin olunması təcrübəsi genişləndirilməlidir
13:28 14 Yanvar 2016
27 Sosial
Ölkə mətbuatı
A- A+

Bakı. Trend:

Bakı Dövlət Universitetinin (BDU) rektoru, akademik Abel Məhərrəmov fəlsəfə doktoru və elmlər doktoru proqramları üzrə doktoranturaya yeni qəbul edilmiş gənc alim və mütəxəssislərlə görüşüb, onları təbrik edərək tövsiyə və tapşırıqlarını verib.

BDU-nun Mətbuat və informasiya şöbəsindən Trend-ə verilən məlumata görə, Universitetin dünyanın bir sıra qabaqcıl elm və tədris müəssisələri ilə əməkdaşlıq etdiyini, hər il ümimi məbləği 5-7 milyon ABŞ dolları həcmində olan 80-dan çox yerli və beynəlxalq proqram və qrantlarda iştirak etdiyini deyən rektor, doktorantları bu layihələrə qatılmağa çağırıb.

Bu ildən başlayaraq Azərbaycan alimlərinə Tomson Reyter Agentliyinin elmi bazasından istifadə imkanlarının yaradılacağını deyən rektor doktorantlara bu bazadan yararlanmağı məsləhət görüb. Eyni zamanda, doktorantların elmi rəhbər məsələsinə toxunan rektor bildirib ki, dünya elminə inteqrasiya, innovativ istiqamətlərin inkişaf etdirilməsi və keyfiyyətin yüksəldilməsi üçün hər bir doktoranta biri xarici ölkədən olmaqla iki elmi rəhbərin və ya məsləhətçinin təyin olunması məqsədəuyğundur.

Fakültə dekanlarına və kafedra müdirlərinə bu məsələdə doktorantlara yardımçı olmağı tapşıran rektor qeyd edib ki, ehtiyac yarandıqda təcrübə mübadiləsi və elmi-tədqiqat işi aparmaq üçün doktorantların xarici ölkələrə ezam edilməsi, o cümlədən xarici ölkələrdən olan elmi rəhbərlərin ölkəmizə dəvəti, onların elmi müzakirələrdə və müdafiə proseslərində iştirakları universitet tərəfindən qarşılanacaqdır. Tədbirdə daha sonra BDU-nun Elm və innovasiyalar üzrə prorektoru, AMEA-nın müxbir üzvü Aydın Kazımzadə, Magistratura və Doktorantura şöbəsinin müdiri professor Afət Məmmədova çıxış edərək doktorantlara lazımi məsləhətlər veriblər.

Bizi Twitter-dən izləyin: @trend_az

RƏYLƏR

BU KATEQORİYADAN DİGƏR XƏBƏRLƏR