[ 30 Dekabr 2014 21:32 ]
Lerik. Ağəddin Babayev – APA. Bu gün Lerik rayonunun Veri və Tikəband kənd inzibati ərazi dairəsinin kəndlərinə gedən Piran-Veri avtomobil yolunun Davradibi çayı üzərində yeni inşa edilmiş körpü istifadəyə verilib. APA-nın cənub bürosunun məlumatına görə, tökmə dəmir-beton konstruksiyadan istifadə edilməklə uzunluğu 15, eni 4.5, hündürlüyü 3.5 metr olan yeni körpünün açılış mərasimində Lerik Rayon İcra Hakimiyyətinin başçısı Rövşən Bağırov, Milli Məclisin deputatı İqbal Məmmədov iştirak ediblər. Veri və Tikəband kənd inzibati ərazi dairələrinə daxil olan 13 kəndin 7 mindən çox əhalisinin bu körpüdən yararlanacağı qeyd olunub.
Yerli sakinlər körpünün tikintisində əməyi olan tikinti şirkətinin rəhbərliyinə və əməkdaşlarına minnətdarlıqlarını çatdırıblar.
Milli Məclisin deputatı İqbal Məmmədov və rayon icra hakimiyyəti başçısı Rövşən Bağırov rəmzi açılışı bildirən lenti kəsdikdən sonra körpü əhalinin istifadəsinə verilib.
