Aşqabad, 19 fevral, AzərTAc
Azərbaycanın Türkmənistandakı səfiri Vəhdət Sultanzadə bu ölkədə qeyd edilən Diplomatlar Günü, Dövlət Bayrağı Günü, Türkmənistanın bitərəflik statusu əldə etməsinin 20 illiyi ilə əlaqədar “Türkmənistan” televiziya kanalına müsahibə verib.
Diplomat Türkmənistan rəhbərliyini və xalqını bayramlar münasibətilə təbrik edib, qədim ortaq tarixə və mədəni irsə malik olan Azərbaycan-Türkmənistan münasibətlərinin inkişaf dinamikasının məmnunluq doğurduğunu diqqətə çatdırıb.
Qeyd edək ki, Dövlət Bayrağı Günü ilə əlaqədar paytaxt Aşqabadda ictimaiyyətin nümayəndələri, hökumət üzvləri və ölkədə akkreditə olunmuş diplomatik korpusun rəhbərləri Prezident Qurbanqulu Berdiməhəmmədovun iştirakı ilə Bayraq Meydanına əklil və gül çələngləri qoyublar. Səfir Vəhdət Sultanzadə də mərasimdə iştirak edib. Bu münasibətlə keçirilən tədbirlər çərçivəsində Azərbaycan səfiri dövlət konsertinə və Türkmənistan rəhbərliyi tərəfindən təşkil edilən rəsmi ziyafətə də qatılıb.
İlahə Əhmədova
AzərTAc-ın müxbiri
Aşqabad
