Sağlam olmağın 7 ƏLAMƏTİ

Sağlam olmağın 7 ƏLAMƏTİ
23:27 3 Yanvar 2015
199 Sosial
Ölkə mətbuatı
A- A+

Qədim Çin təbabətinə görə sağlam olmağın 7 əlaməti mövcuddur ki, onların bir çoxu insanın birbaşa fiziki sağlamlığına deyil, psixi və emosianal sağlıq durumuna aiddir.

Milli.Az modern.az-a istinadən xəbər verir ki, Çin təbibləri bildirilər ki, bu cür yanaşma insanın fiziki sağlamlığını daha dəqiq müəyyən edir.

1. Sağlam olmağın birinci əlaməti insanın yerişinin qətiyyətli, gözlərinin parlaq, baxışlarının canlı, bütün gördüklərini maraqla seyr etməsi, qamətinin düz olmasıdır. Məhz belə əlamətlər kənardan insanı tam enerjili, bütün işlərin öhdəsindən yorulmadan və xoş əhvalla lazımınca gəlməyi bacaran bir varlıq kimi göstərir.

2. Şərq müdriklərinin belə bir deyimi var: “Yeməyi almaq olar, iştəhanı yox”. Sağlam olmağın əlamətlərindən biri insanın iştəhalı olmasıdır. Sağlam insan süfrə arxasına məmnunluqla, həvəslə keçməlidir. Şərqdə iştəhalı olmaq, qidalanmaq təkcə aclığı aradan qaldırmaq kimi dəyərləndirilmir, o həm də yeni fəaliyyət, yaşamaq istəyi üçün insanın növbəti bir cəhdi kimi qiymətləndirilir.

3. Şərq müdriklərinin belə bir deyimi də var: “İstənilən yatağı almaq olar, amma yuxunu almaq mümkün deyil”. Çin təbibləri sağlam olmaq üçün ən azı 4-6 saat dərin yuxunun vacibliyini xüsusilə vurğulayırlar. Onların qənaətinə görə sağlam insan üçün 4-6 saat yuxu yetərlidir. Əgər insan sutka ərzində 10-12 saat yatırsa, yaxud səhər tezdən oyananda özünü tam gümrah hiss etmirsə bu artıq sağlamlıqda olan ciddi problemlərə işarədir. Normal, sağlam, dərin yuxu sağlam olmağın əlamətidir.

4. Sağlam olmağın digər əlamətlərindən biri istənilən yaşda yaddaşın normal olmasıdır. Elə düşünmək lazım deyil ki, yaş artdığca yaddaş zəifləməlidir. Qədim Çin təbabəti bu fikri yanlış sayır. Sağlam insan yaşından asılı olmayaraq uzaq keçmişində və yaxın ötən günlərdə baş verən hadisələri asanlıqla xatırlamalıdır.

5. Sağlam insan yumor hissinə malik olmalıdır. O təkcə ətrafında olan hadisələrə deyil, həm də özü ilə bağlı bəzi məqamlara yumor hissi ilə yanaşıb gülməlidir. Əgər insanda yumor hissi yoxdursa, demək onun sağlamlığında problemlər var.

6. Qədim Çin təbabətində sağlam olmağın əlamətlərindən biri də insanın öz işinə, ailəsinə, dostlarına, ona ehtiyacı olanlara, cətin vəziyyətə düşmüş insanlara mərhəmət göstərməyi, kömək etməyi, özünü verməyi bacarmasıdır. Bunu bacarmayanlar sağlamlıqları haqqında ciddi düşünməlidirlər.

7. Sağlam olmağın yeddinci əlaməti odur ki, insan qarşıya çıxan və ya onu gözləyən problemi vaxtında aradan qaldırmağı bacarır, düzgün qərarlar verir və öz enerjisini lazımi istiqamətə yönəltməyi bacarır. İstənilən bir problemin həllində yubanma, qorxu və qəzəb hissi, yaxud inciklik, paxıllıq, qisas kimi digər hislər bədənin enerji balansının pozulması, tənasübsüzlüyü kimi xəstəliyin göstəricisidir.

Çalışın bu 7 əlaməti öz həyatınıza gətirəsiniz və dünyanın əvəzsiz neməti olan sağlamlıq həmişə sizinlə olsun.

Milli.Az


Xəbərin orijinal ünvanı: http://news.milli.az/health/317121.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR