"Norveç millisi Azərbaycanla oyunun favoritidi. Düzdü, mən 100 faiz əmin deyiləm ki, səfərdən qalib ayrılacağıq".
Milli.Az apasport.az-a istinadən xəbər verir ki, bu sözləri Norveç millisinin sabiq futbolçusu Mini Yakobsen deyib.
"Rusenborq" və yığmadakı çıxışları ilə tanınan futbol veteranı DÇ-2018-in seçmə mərhələsinin Azərbaycan və San-Marino ilə matçları haqda fikirlərini açıqlayıb. Yakobsen iki qarşılaşma üçün hədəflərini gizlətməyib: "Ötən tsikldə rəqib meydanında 1:0 hesabı ilə yendiyimiz komandanı evdə uda bilməmişdik. Bakıda oyunun çox gərgin keçəcəyini gözləyirəm. Buna baxmayaraq, yığmamız qarşıdakı 2 matçda 6 xal əldə etməlidi. Əgər seçmə mərhələni 2-ci yerdə başa vurmaq istəyiriksə, Azərbaycan və San-Marino ilə matçlarda xal itirməməliyik. Almaniyaya biabırçı məğlubiyyət Norveç üçün dərs oldu. Lakin 3 vacib oyun öncəsi bu pis oldu. İndi Azərbaycan və San-Marinonu yenib, Çexiyadan 1 xalla dönməliyik".
Qeyd edək ki, Azərbaycan - Norveç oyunu oktyabrın 8-də keçiriləcək.
Milli.Az