"Hakimlər bu oyunlarda səhv etdilər" - Xaqani Məmmədov

"Hakimlər bu oyunlarda səhv etdilər" -   Xaqani Məmmədov
09:07 5 Oktyabr 2016
33 İdman
Ölkə mətbuatı
A- A+

AFFA Hakimlər Komitəsinin sədri Xaqani Məmmədovun Fanat.Az saytına müsahibəsi


- Premyer Liqanın ilk dövrəsi başa çatdı. Geridə qalan 7 tura əsasən hakimlərin işini necə qiymətləndirirsiniz?

- Hesab edirəm ki, idarəçilik normal oldu. 1-2 oyunu çıxmaq şərti ilə. Bəzi matçlarda yekun nəticəyə təsir edən səhvlər oldu və təbii ki, həmin hakimlər cəzalanadırılıb.


- “Bəzi matçlar” deyərkən, konkret hansı oyunları nəzərdə tutursunuz?

- AZAL - “Neftçi” (0:2), “Qəbələ” - “Sumqayıt” (2:0) və “Sumqayıt” - AZAL (1:1).


- Gəlin, elə ilk oyundan başlayaq. Qeyd etdiniz ki, səhv edən hakimlər cəzalandırılıb. Lakin AZAL - “Neftçi” qarşılaşmasında əlavə köməkçi hakim olan Ramil Diniyev meydan sahiblərinin qolunu qeydə almadı, amma növbəti tur  “Neftçi” - “Zirə” duelində fit çaldı. Bu necə olur?

- Həmin oyunda Ramil Diniyevin səhvi yox idi. Yəqin ki, topun qapı xəttini keçib-keçməməsi məsələsini nəzərdə tutursunuz. Biz həmin epizodu səhv kimi nəzərə almadıq. Səhvi baş hakim etdi. Həmin epizodda qayıdan topu AZAL-ın futbolçusu qapıdan keçirən zaman qayda pozuntusu yox idi. Rəhim Həsənov qolu qeydə almalıydı. Səhv etdiyinə görə də cəzalandı. 


- Əgər Diniyevin səhvə yol verdiyini düşünümürsünüzsə, onda qapı arxasındakı əlavə köməkçi hakim nəyə lazımdı? Hər halda, orada dayanan hakimin işi topun qapı xəttini keçib-keçmədiyini görmək və cərimə meydançasında hər hansı qayda pozuntusu olanda referiyə bildirməkdi. Ramil bəy həm qolu qeydə almır, həm də qayda pozuntusu olmadığını görmür...

- Həmin epizodda top qapı xəttini keçməmişdi.


- Ancaq oyunun görüntülərini izləyən zaman topun qapı xəttini keçməsi təəssüratı yaranır.

- Onu heç kim müəyyən edə bilməz. Mən də baxanda deyirəm ki, qoldur. Amma xəttə insan dayanıb. Ən doğru qərarı qapı arxasında dayanan hakim verə bilər. O da qol olaraq qeydə almayıb. Xəttdə kamera olsaydı, konkret bir söz deyə bilərdik.


- “Qəbələ” -  “Sumqayıt” görüşündə Dabonun vurduğu ilk qol mübahisə doğurdu. Matçı canlı yayımlayan “CBC Sport” təqdim etdiyi görüntülərə əsasən dəqiq bir nəticəyə gəlmək olmur. PFL-in kameraları köməyinizə çatdı? “Qəbələ”nin hücumçusu həmin epizod oyundan kənarvəziyyətdədir?

- İnanırsınız, heç həmin görüntülər də müəyyənləşdirməyə kömək etmir. Bax, görürsünüz, biz 50 dəfə baxıb müəyyənləşdirə bilmirik, amma hakim onu bir dəfə görüb, o da 30 metr aralıdan və yandan.


- Yan xətt hakimi üçün çətin epizoddur?

- Orada 6 ayaq iştirak edir: 2 müdafiəçi, 1 hücumçu. Heç cür görə bilmir. Həmin epizodla bağlı bir incəlik var: əgər top vurulduqdan sonra müdafiəçiyə dəyib, “rikoşet”dən sonra Dabonun qabağına düşürsə - oyunda kənar vəziyyətdir. Yox, zərbədən sonra müdafiəçi topu uzaqlaşdırmaq məqsədi ilə  həmlə edirsə və top onun ayağından Daboya gəlirsə - bu, oyundankənar vəziyyət deyil. Belə vəziyyətdə günahı boynumuza götürdük ki, hakim səhv edib. 


- Qeyd etdiyini sonuncu matçda - “Sumqayıt”la AZAL-ın duelindəki səhvlər hansıdı? Meydan sahibləri AZAL-ın qolu oyundankənar vəziyyətdən vurduğunu iddia edirlər və 11-ci dəqiqədə isə Ayaz Mehdiyevə qarşı edilən kobudluğu penalti olaraq qiymətləndirirlər...


- AZAL-ın qol epizoduna dəqiq baxmamışam. Gərək başqa görüntüləri də izləyim. Ancaq digər epizodda haqlıdırlar: orada penalti verilməli idi. Hakimlər səhvə yol verdilər. Xüsusən də, əlavə köməkçi hakim. Çünki referi üçün çətindir, görə bilməz.


- Hakimliklə bağlı özünüzün də etiraf etdiyiniz səhvlər olsa da, hələlik böyük qalmaqallar yaşanmayıb. Bunu nə ilə əlaqələndirirsiniz: çempionatın səviyyəsi çox aşağı düşüb, yoxsa hakimlərimiz “artırıb”?

- Tərif kimi çıxmasın, bu yay əvvəlkilərdən yaxşı işlədik, səmərəli təlim-məşq toplanışımız oldu. İndi rəqabət daha güclüdür. Heç kim inciməsin - nə “Xəzər Lənkəran”, nə də “Rəvan”. Ötən mövsüm komandalar onlarla oyunlarda o qədər də əziyyət çəkmədən xal qazanırdılar. Ancaq indi rəqabət artıb. İlk “üçlük” bir az qabağa getsə də, komandaların səviyyəsi arasında ciddi fərq yoxdur. 


- Referilərdən ən çox kimlərdən razısınız?

- Əliyar Ağayevin ötən mövsüm səhvləri olsa da, cari çempionatda çox yaxşı təsir bağışlayır. AZAL - “Neftçi” oyununu nəzərə almasaq, Rəhim Həsənovdan da razıyam. 


- Əliyar Ağayev bizi yaxşı mənada təəccübləndirməkdə davam edir.  Son olaraq Avropa Liqasında “Roma” - “Astra” matçını idarə etdi...

- Çox maraqlı oyun oldu. Hakimlərimizin işini hamınız gördünüz. Çox rahat idarə etdilər.


- Əliyar Ağayev həmin matçdakı idarəçiliyə görə neçə qiymət aldı?

- Qiyməti yüksəkdir. Yüz faiz əminəm ki, növbəti turda da təyinat alacaq.


- Ağayev özü müsahibəsində bildirdi ki, əsas hədəfi I kateqoriyaya daxil olmaqdır. Bunun üçün hazırda onda nə çatmır? Yüksəlmək üçün daha hansı keyfiyyətlərə ehtiyac var?

- Onun minimum hədəfi budu. Düşünürəm ki, Əliyar artıq I kateqoriyaya layiqdir. O, artıq relsə düşüb. Kateqoriya il ərzində 2 dəfə dəyişir: qışda və yayda. Ümid edirəm ki, artıq qışda I kateqoriyaya yüksələcək. Avropa Liqasında bir neçə oyun idarə edib, artıq yolu açılıb. 


Şamo

Fanat.Az


Xəbərin orijinal ünvanı: http://fanat.az/xeber-quothakimlr-bu-oyunlarda-shv-etdilrquot-t53086.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR