İran prezidenti Həsən Ruhani postunu itirmək təhlükəsi
ilə üz-üzədir.
2015-ci ilin iyulunda “Altılıq” ölkələri (Böyük Britaniya, Fransa, Rusiya, Almaniya, ABŞ və Çin) ilə İran arasında tarixi anlaşma əldə olundu. İranın nüvə proqramının inkişafına beynəlxalq nəzarətin edilməsinin əvəzinə bu ölkəyə qoyulan sanksiyalar ləğv edildi. Bu sazişin beynəlxalq iqtisadiyyata, eləcə də İranın daxili vəziyyətinə ciddi təsir edəcəyi haqda qızğın müzakirələr gedirdi.
Publika.az xəbər verir ki, mühafizəkarlar Ruhanini nüvə
anlaşması çərçivəsində həyata keçirmək istədiyi çirkli pulların
yuyulması ilə mübarizə üzrə maliyyə sisteminin tətbiqinə və bank
sistemində dəyişikliklərə görə ciddi tənqid edirlər.
İran İnqilab Keşişçiləri Korpusu Ruhaninin bu addımlarının ölkənin
suverenliyinə təhlükə olduğunu düşünürlər.
Mühafizəkarlar Ruhanini “vətənə xəyanət”də ittiham edirlər. Hətta
onlar Ruhaninin bu maliyyə sistemini tətbiq etməsini dinə qarşı
çıxmaq kimi təqdim edərək, Yüksək Təhlükəsizlik Qurumunu və Baş
Prokurorluğu bunu dayandırmağa çağırırlar.
Çirkli pulların yuyulması ilə mübarizə üzrə maliyyə sistemi 1989-cu
ildə yaradılıb. 2001-ci il 11 sentyabr terrorundan sonra terrorçu
qruplara pul axınının qarşısını almaq üçün də bu sistem
təkmilləşdirilib.
2007-ci ildə İran, Şimali Koreya və Kuba bu sistem üzrə qara
siyahıya salınıb. Bunun nəticəsində hər üç ölkənin bank sektoru
ciddi ziyan gördü. Sanksiyalar dövründə İran çirkli pulların
yuyulması və terrorçulara pul göndərməkdə ittiham olunurdu. Hazırda
Kuba qara siyahıdan çıxarılsa da, İran və Şimali Koreyanın adı hələ
də qalır.
İran qara siyahıdan çıxmaq üçün indiyə qədər bir sıra addımlar
atıb. Məlumatlara görə, İranın keçmiş prezidenti Mahmud
Əhmədinejadın ilk iqtidar dövründə hökumət nümayəndələri Parisdə
ABŞ rəsmiləri ilə gizli görüşlər keçirsə də, anlaşma əldə olunmadı.
İran adının qara siyahıdan çıxarılması üçün 2009-cu ildə çirkli
pulların yuyulması ilə mübarizə haqqında qanun qəbul etdi. Lakin
İranın adı siyahıdan çıxarılmadı.
Ruhaninin vaxtilə İrana qarşı tətbiq olunan maliyyə sistemini qəbul
etməsi ölkənin suverenliyini təhlükə altına almaq kimi
qiymətləndirilir.
Ehtimallara görə, 2017-ci il prezident seçkilərində mühafizəkarlar
Ruhanini devirə bilər.
“İkinci islam inqilabı”: öz balalarını diri-diri yeyən İran xilas ola bilmir