Bu ilin fevral ayında AZAL-ın futbolçusu Rüfət Musayevdə xərçəng xəstəliyinin aşkarlanması barədə mətbuatda məlumat getmişdi. Xəstəlik Rüfəti futboldan məcburən uzaq salmışdı. Üstündən 7 ay vaxt keçib.
Fanat.Az xəbər verir ki, "Het-trik news" qəzeti bu müddətdə 1 dəfə cərrahiyə əməliyyatına məruz qalan və 8 kurs kimyəvi müalicə alan Rüfətlə əlaqə saxlayaraq vəziyyətini öyrənib. Rüfət özünü yaxşı hiss etdiyini bildirib: “Bir neçə gün əvvəl analizləri Moskvaya göndərmişik. Oktyabrın 20-ə kimi nəticələri bilinməlidi. Ümid edirəm ki, xoş xəbər alacam. Əməliyyatın yeri demək olar ki, tam sağalıb. Aldığım müalicədən sonra səhhətimdə irəliləyiş var. Bir ara xərçəng ağciyərimə metastaz vermişdi. Aldığım kimya terapiyalarının köməyi oldu. İndi demək olar ki, heç nə yoxdur. Özümü gümrah hiss edirəm".
Rüfət əməliyyat və müalicə xərcləri, o cümlədən, komandasının ona göstərdiyi dəstəklə bağlı danışıb. Məlum olub ki, 7 ay ərzində nəinki AZAL, həmçinin, Premyer Liqa və 1-ci dəstə klubları, ayrı-ayrı futbolçular Rüfətə həm maddi yardım göstəriblər, həm də mənəvi dayaq durublar: “AZAL rəhbərliyinə və baş məşqçi Tərlan Əhmədova minnətdarlığımı bildirirəm. Müalicəmin böyük hissəsini Moskvada aldım. Orada qiymətlər bir qədər bahadı. Həm də yol xərclərini qarşılamaq lazım idi. Onların maddi yardımı ilə lazımi müalicə götürə bildim. AZAL-dan başqa digər klublarımız, ayrı-ayrı futbolçular da mənə maddi yardım göstərdilər. Kimisə yaddan çıxaracağımdan ehtiyatlanaraq ad çəkmirəm. Sonra yaxşı alınmaz. Hamısına minnətdaram".
Rüfətin sözlərinə görə, indiyə kimi müalicəsinə 40 min manatdan çox xərc çıxıb. Bunun 11 minini atası banklardan və ayrı-ayrı şəxslərdən borc götürüb: “Pulun önəmli olmadığın deyə bilmərəm. Son analizlərimi burada vermişəm və yoxlanması üçün Moskvaya göndərmişik. Amma oradakı həkim düzgün cavab almaq üçün mütləq Moskvaya getməli və təkrar analiz verməli olduğumu bildirir. Bu isə əlavə vəsait tələb edir. Hər halda ruhdan düşmürəm. Bacardığımızı edəcəyik. Sağalıb yenidən futbola qayıdacağıma inanıram".
Yeri gəlmişkən, həkimlər Rüfətə yenidən futbol onaması üçün heç bir problemin olmadığını söyləyiblər. Əsas odur ki, müalicə uğurla başa çatsın. Ümid edik ki, bu baş verəcək və tezliklə Rüfəti yaşıl meydanlarda görəcəyik.
Fanat.Az
