AFFA-nın baş katibi Elxan Məmmədov bu gün millimizin Norveçlə oyun qabağı son məşqçisini izləmək üçün “Olimpiya” stadionuna gələn jurnalistlərin suallarını cavablandır.
- Sabahkı oyunla bağlı fikirlərinizi bilmək maraqlı olardı...
- Bu seçmə mərhələdə Bakıda ilk oyunumuzdur. Azarkeşlər 3 xal gözləyir. Nəzərə alaq ki, ötən seçmə mərhələdə də Norveç millisi ilə oynadıq. Evdə uduzsaq da, səfərdə heç-heçə etdik və həmin oyunda baş məşqçi elə Robert Prosineçi idi. Futbolçuların da 90 faizi həminkilərdi. Azarkeşləri tribunalara dəvət edirik. 30-35 insan “Olimpiya” stadionunda elə də çox görünmür. Bizə də lazımdı ki, rəqib meydançaya daxil olanda, azarkeşlərin səsindən onlarda həyəcan, təzyiq olsun.
- AFFA prezidenti Rövnəq Abdullayevi bir qədər əvvəl milli üzvləri ilə görüşdü. Nələrdən danışıldı, nələr və olundu mükafat anlamında?
- Təlim-məşq toplanışında da görüş olmuşdu. İndi də ziyarət etdi. Bildirdi ki, ilk 3 xalımızı qazanmışıq, sabah da qalib gəlməliyik. AFFA rəhbərliyi, azarkeşlər, hər kəs qələbə gözləyir. Burda deməliyəm – niyə də yox! (gülür)
- Turnir cədvəlində 2-ci pillədəyik. Millimizi mövqeyin qoruya biləcək?
- Mümkündür. Əsas olan bizim qalib gəlməyimizdir.
- Almaniya uduzsa, biz qalib gəlsək, ilk pilləyə yüksələcəyik.
- (gülür) Bu bir az çətin məsələdir. Bir tərəfdən müsbət haldır, heç kim almanlardan xal almayacaq. 2 və 3-cü yerlər uğrunda mübarizə gedəcək.
- Özünüz də qeyd etdiniz ki, “Olimpiya” stadionunu doldurmaq çətindir. Olmazdı ki, Norveçi 30 min nəfər tutumu olan “Tofiq Bəhramov”da qəbul edək?
- Bunu məmnuniyyətlə istərdim. Ancaq biz 2020-ci ilə qədər bu stadionu yoxlamalıyıq. Nə qədər çox oyun olsa, bir o qədər yaxşıdır. Bu, həm də UEFA-nın tövsiyəsidir. Digər tərəfdən, orada hazırda həm ot örtüyü yaxşı deyil, həm də “Qarabağ” rəqiblərini qəbul edir.
- FİFA prezidentinin sizə vəzifə təklif etməsi və imtina etmənizlə bağlı xəbər çıxıb. Doğrudu?
- İcazə versəydiniz, bu suala cavab verməzdim. Çünki şəxsi məsələdir.
- San Marino ilə oyunda qələbəyə görə mükafat verilmədi. Bəs, qarşıdakı oyuna necə?
- Bizdə bir sistem var. Sistem ondan ibarətdir ki, komanda hər 3 xala mükafat alır. Lakin seçmə mərhələdə pley-offa və ya final mərhələsinə vəsiqə qazansa, əlavə mükafat da alacaqlar. Unutmayaq ki, millidə oynayan futbolçular heç vaxt mükafat məsələsini qaldırmayıblar. Lakin onlar AFFA-dan maaş almır, ona görə də mükafat veririk ki, stimul olsun.
- Sizcə, azarkeş sayı baxımından problem olmaz?
- Olmamalıdır. Həftəsonudu, biletlər ucuzdu. Hər kəsi stadiona çağırırıq. İstərdik ki, stadionun ən azı 70 faizi dolsun.
- Bir neçə gün öncə Londonda mükafat aldınız, təbrik edirik...
- Çox sağ olun. İyun ayında mənə məktub gəldi ki, nominasiyada varam. Açığı, rəqiblərim güclü idi. Optimist deyildim. Sevindirici haldır ki, məni layiq gördülər, Azərbaycanın adı çəkildi.
Fanat.Az