Milli.Az xəbər verir ki, yol-nəqliyyat məsələləri üzrə ekspert Ərşad Hüseynov bildirib ki, bu gün səhər saatlarında Bakı-Sumqayıt yolu kənarında təxminən 20-25 dəqiqə dayanıb müşahidə aparıb və maraqlı mənzərənin şahidi olub.
Əsas diqqətini təhlükəsizlik kəmərindən istifadəyə yönəltdiyini deyən Ə.Hüseynovun sözlərinə görə, orta hesabla vəziyyət əvvəlkindən yaxşı olsa, ümumilikdə qənaətbəxş deyil:
"Təxminən 10 sürücüdən 7-si kəməri bağlayır (70% pis deyil).
Kəməri bağlı sərnişin görmədim, deməli, sərnişinlərin kəmərdən istifadəsi 0% ətrafındadır. Bu, biabırçılıqdır!
Kəməri bağlamayan sürücülər isə əsasən bunlardır:
- Bütün kateqoriyalardan olan avtobus sürücüləri - təxminən 20 sürücüdən yalnız biri kəmər bağlayır (uzağı - 5%);
- Taksi sürücüləri - hər 3 taksi sürücüsündən 2-si maşını kəmər bağlamadan sürür (kəmər taxanlar təxminən 35%);
- Yük avtomobili sürücüləri - kiçik yük avtomobillərinin sürcülərinin təxminən 70%-i kəməri bağlı sürür. İri, yəni 3,5 tondan ağır yük avtomobillərinin sürücüləri isə çox intizamsızdırlar. Onların 10-dan birində kəmər görmək olar;
- Paqonlu sürücülər (təxminən 7-8 paqonlu sürücü gördüm, cəmi ikisinin kəməri bağlı idi, hətta 1 nəfər paqonlu və kəmərsiz qadın da gördüm);
- Kəmər taxmayan və hər hansı xüsusi əlaməti olmayan başqa sürücülər də az deyil".
- Maraqlısı odur ki, kifayət qədər bahalı avtomobilləri idarə edən və imkanlı şəxs görkəmi olanlar arasında da kəmərlə sürənlər çoxdur".
Ekspertin diqqətimi başqa şey də cəlb edib: "Taksi tanınma nişanı olmasa da, təxminən hər 20 maşından biri məni potensial müştəri sayaraq yolüstü "xalturşik"lərə xas işarə verirdilər".
Yusif Nəsirli
Milli.Az